Debatuan për përparësinë në trafik, shoferi nga Shqipëria e bën belgun për spital, rrezikon 6 muaj burg

Një shqiptar 23-vjeçar goditi një belg tri herë në fytyrë pas një debati për përparësi në trafikun e lagjes së stacionit në Gent të Belgjikës

Një shqiptar 23-vjeçar u paraqit të mërkurën në mëngjes para gjykatës penale për agresion të rëndë rrugor.

Ngjarja ndodhi më 8 shkurt të vitit të kaluar në lagjen e stacionit në Gent, ku një debat banal për përparësinë në trafik doli plotësisht jashtë kontrollit.

Dy burra u konfliktuan pranë kafenesë “De Klok”.

Shqiptari zbriti nga makina e tij, hapi derën e automjetit të shoferit tjetër dhe e goditi atë tri herë me grusht në fytyrë. Viktima pësoi lëndime dhe u shpall i paaftë për punë për tre ditë.

Sipas avokatit të viktimës, pasojat janë më të mëdha sesa vetëm dëmtimet fizike.

“Që prej ngjarjes, klienti im nuk ndihet më i sigurt në trafik”, u shpreh ai. Viktima kërkon një dëmshpërblim të përkohshëm prej 2.000 eurosh.

Prokuroria i mori faktet shumë seriozisht dhe kërkoi një dënim me gjashtë muaj burg. I pandehuri kishte ardhur posaçërisht nga Shqipëria për t’u paraqitur para gjykatës.

Ai i minimizoi ngjarjet dhe deklaroi se fillimisht ishte fyer nga pala tjetër.

Gjykatësi do të shpallë vendimin më 4 mars.