Anija luftarake ruse zhvillon stërvitje me q*tje pranë Britanisë/ Marina mbretërore e monitoron

Një anije luftarake ruse ka zhvilluar një stërvitje me municion të vërtetë në ujërat ndërkombëtare pranë brigjeve të Britanisë së Madhe, ndërsa është ndjekur nga afër nga Marina Mbretërore.

Fregata ruse “Neustrashimy” kreu një stërvitje artilerie rreth 40 milje detare në jug të Plymouth, gjatë së hënës. Sipas Ministrisë së Mbrojtjes së Britanisë, anija është monitoruar nga një anije e Marinës Mbretërore dhe aktiviteti i saj po ndiqet nga afër.

Para nisjes së qitjes, anija ruse njoftoi patrulluesen britanike HMS Tyne për aktivitetin e planifikuar dhe kërkoi që ajo të largohej në një distancë më të sigurt. Stërvitja zgjati rreth 30 minuta dhe u zhvillua në përputhje me rregullat e ujërave ndërkombëtare.

Gjithashtu, një avion ushtarak francez monitoroi lëvizjet e fregatës dhe kontaktoi përmes radios ekuipazhin rus për të kërkuar sqarime mbi qëllimet e misionit.

Incidenti vjen në një kohë kur Britania e Madhe ka raportuar rritje të aktivitetit detar rus pranë ujërave të saj. Muajin e kaluar, forcat britanike kryen një operacion ndaj një anijeje nafte të lidhur me të ashtuquajturën “flotë në hije” të Rusisë në Kanalin Anglez.

Ndërsa anijet luftarake ruse vazhdojnë të kalojnë rregullisht nëpër ujërat ndërkombëtare të Kanalit, autoritetet britanike kanë theksuar se po monitorojnë me kujdes çdo lëvizje të tyre në rajon.