Alarm në SHBA nga tymi i zjarreve/ New York, Chicago dhe Detroit mbulohen nga ajri toksik

Një valë e dendur tymi nga zjarret masive pyjore në Kanada dhe disa zona të SHBA-së ka përfshirë qytete të mëdha amerikane, duke shkaktuar një përkeqësim të fortë të cilësisë së ajrit.

Detroit, Chicago dhe Uashingtoni janë renditur ndër qytetet me ajrin më të ndotur në botë, ndërsa New Yorku është përfshirë gjithashtu nga nivele shqetësuese të ndotjes. Shumë banorë kanë vendosur sërish maska mbrojtëse, ngjashëm me periudhën e pandemisë COVID-19.

Sipas matjeve të platformës IQAir, indeksi i ndotjes ka arritur nivele alarmante, me Detroitin në 435 pikë dhe Chicagon në 330 pikë, shifra që konsiderohen shumë të rrezikshme për shëndetin.

Një shtresë e trashë tymi gri ka mbuluar qytetet, duke ulur ndjeshëm dukshmërinë. Në Uashington, monumente të njohura si Memoriali i Linkolnit dhe Monumenti i Uashingtonit mezi dalloheshin për shkak të mjegullës së krijuar nga grimcat në ajër.

Autoritetet kanë aktivizuar alarmet për cilësi shumë të keqe të ajrit dhe u kanë bërë thirrje qytetarëve të shmangin aktivitetet në ambiente të hapura, veçanërisht personave me probleme shëndetësore.

Sipas ekspertëve, burimi kryesor i ndotjes janë zjarret e mëdha pyjore në provincat kanadeze Ontario dhe Quebec, si dhe në shtetin amerikan Minnesota. Ndryshimet klimatike dhe periudhat e gjata të thatësirës po favorizojnë përhapjen e zjarreve më të shpeshta dhe më intensive.