Shqipëri: Zbulohet celula terroriste iraniane planifikoi sulmin e marsit 2018

Një celulë aktive terroriste e drejtuar nga regjimi iranian, i njësisë klandestine dhe sekrete të forcave QUDS është zbuluar në Shqipëri.

Synimi i këtij rrjeti ishte kryerja e sulmeve ndaj lëvizjes opozitare iraniane (MEK) që njihen si refugjatët muxhahedinë në Shqipëri, deklaroi Drejtori i Përgjithshëm i Policisë së Shtetit, Ardi Veliu ne një deklaratë për median së bashku me Drejtorin e Drejtorisë së Antiterrorit Gledis Nano.

Celula terroriste kishte planifikuar të kryente një akt terrorist gjatë festës së Novruzit ne mars 2018, por që u parandalua

Ardi Veliu: "Një celulë aktive terroriste e njësisë së operacioneve të jashtme të Forcave QUDS iraniane është zbuluar së fundmi nga Institucionet Shqiptare të Sigurisë. Celula terroriste është gjithashtu përgjegjëse, mes të tjerash, për planin e muajit mars 2018 për kryerjen e një akti terrorist gjatë kremtimeve të Festës së Nevruzit, të frekuentuar nga anëtarë të nivelit të lartë të organizatës opozitare iraniane Mujahedeen el Khalq (MEK), plan që u parandalua nga masat e shtuara të Policisë së Shtetit, falë informacioneve të sakta." 

Në atë kohë, (mars 2018)  u ndaluan dy shtetas iranianë ne mjediset e jashtme të kryegjyshatës botërore dy shtetas iranianë të dyshuar si persona të përfshirë në veprimtari terroriste. Në momentin e ndalimit po bënin foto dhe u thanë oficerëve të antiterrorit se ishin gazetarë dhe kishin ardhur me ftesë të kryegjyshatës botërore. 

 Celula menaxhohej nga Irani - Celula terroriste drejtohej nga operativi i Forcave QUDS, i njohur si Peyman rezident i përhershëm në Iran dhe menaxhon në distancë një numër operativësh në Shqipëri dhe në vende të tjera në Evropën Qendrore dhe Perëndimore. 

"Mes të tjerash, ai inicioi dhe zbatoi tentativën e fundit për sulm në muajin mars 2018. PEYMAN menaxhon shumë operativë, disa për grumbullim informacioni dhe të tjerë për të kryer sulme terroriste" informoi Veliu

Nderlidhesi- Një nga operativët, Alireza Naghashzadeh u dërgua nga PEYMAN-i për të grumbulluar informacion në Shqipëri gjatë disa vizitave të veçuara, si pjesë e planeve për një sulm që eventualisht u ndalua. Iraniani Naghashzadeh kishte qenë vetë një ish-anëtar i MEK-ut dhe zotëronte një pasaportë austriake.

Lidhjet e bosit mafioz turk me Shqiperine-  Celula kishte lidhje dhe me bosin mafioz turk i cili u u arrestua ne Shqiperi ne vitin 2011 per  trafikimin e dyshuar të rreth 1 ton heroinë, por me pas u arratis duke përdorur një pasaportë false

Ardi Veliu:"Një tjetër operativ, është Abdolkhalegh MALEK ZADEH, një iranian që jeton në Turqi dhe që ka drejtuar celulën operacionale. MALEK ZADEH (i njohur gjithashtu nga lidhjet kriminale me pseudonimin “Ferhat”) ka vazhduar të punojë gjatë dy viteve të fundit me Abdulselam TURGUT, një figurë e njohur e krimit të organizuar turk, për të planifikuar sulme terroriste me urdhër të PEYMAN-it dhe të Forcave QUDS. 

TURGUT, i njohur si një bos mafioz turk dhe kreu i një rrjeti të fuqishëm ndërkombëtar të trafikut të drogës është burgosur së fundmi në Azerbajxhan dhe në Turqi me akuza për trafik droge. TURGUT ka gjithashtu lidhje të vjetra me krimin e organizuar në Shqipëri. TURGUT është liruar nga një burg në Turqi në fund të vitit 2018. Në vitin 2011, TURGUT është burgosur gjithashtu në Shqipëri me akuza në lidhje me trafikimin e dyshuar të rreth 1 ton heroinë, por u arratis nga vendi duke përdorur një pasaportë false, pasi gjykata ndërroi masën e sigurisë nga “Arrest në burg” në “Arrest shtëpie”.

Si u parandalua sulmi i 2018 - "Operativët kriminelë, me bazë në Ballkan, që janë vartës të TURGUT-it ose të një trafikanti droge turk të lidhur me të, nga viti 2018, janë dërguar në Shqipëri për të avancuar planifikimin e sulmeve kundër MEK-ut, siç ishte diktuar nga MALEK ZADEH dhe Forcat QUDS. Autoritetet shqiptare i kanë identifikuar këta individë dhe informacioni i siguruar nga informatorë nga brenda organizatave kriminale i ka lejuar autoriteteve shqiptare që të parandalojnë planin e marsit 2018 dhe planifikimet eventuale për sulme nga figurat e krimit të organizuar që kishin si objektiv MEK-un për llogari të regjimit Iranian" deklaroi drejtori i policise.

Kush jane forcat QUDS - Forcat QUDS janë krahu operacional i IRGC (Islamic Revolutionary Guard Corps – Trupat e Gardës Revolucionare Islamike të Iranit) që vepron përtej kufijve të Iranit. Forcat QUDS drejtohen nga Qassem SOLEIMANI, i cili është përgjegjës, mes të tjerash, për aktivitetin e Iranit në Jemen, Irak, Siri dhe Liban.

 Celula terroriste i përkiste, siç u përmend, njësisë së operacioneve  të  jashtme të  Forcave QUDS, një  njësi operacionale  e  konsideruar si klandestine dhe sekrete, e cila është përgjegjëse për planifikimin dhe zbatimin e aktivitetit terrorist jashtë Iranit. Brenda kësaj njësie, ka një nënnjësi që merret ekskluzivisht me organizatat që janë kundër regjimit. 

"Modus Operandi i njësisë përfshin menaxhimin nga distanca të forcave të treta (proxy), zakonisht kriminelë dhe anëtarë të mafies me të kaluar të ndryshme, në mënyrë që të mbulohet përfshirja e Iranit në terrorizëm. Duke përdorur këtë Modus Operandi, MOIS (Ministry of Intelligence and Security – Ministria e Inteligjencës dhe Sigurisë) të Iranit ka vrarë të paktën 4 opozitarë të regjimit në Holandë, Gjermani dhe Turqi dhe ka organizuar sulme të pasuksesshme, sikurse ishte sulmi i fundit i mbetur në tentativë kundër konferencës së MEK-ut në Paris, në Qershor 2018."

Shenjestra e celules ishte MEK 

Nga viti 2014, në koordinim me Kombet e Bashkuara dhe SHBA- ja, Shqipëria ka pritur një numër anëtarësh të MEK-ut, një organizatë që e sheh veten si opozita në mërgim dhe si një alternativë praktike ndaj regjimit iranian dhe për këtë shkak regjimi iranian e sheh atë si kërcënim serioz për mbijetesën e tij. MEK-u është një shënjestër kyçe për forcat e sigurisë iraniane, të cilat tentojnë të sulmojnë anëtarët e organizatës kudo ku ata mund të jetojnë dhe operojnë jashtë Iranit.  

"Institucionet shqiptare të sigurisë po punojnë vazhdimisht për të ndalur këto tentativa për sulm" mbylli deklaraten drejtori i policise.

Zbulimi i planit per sulm terrorist ne mars 2018 ne festen e Sulltan Novruzit dhe arrestimi i dy te huajve u pasua ne ate kohe me vendimin e kryeministrit Edi Rama për dëbimin e ambasadorit iranian.

 
Gjeneralitete:
1.PEYMAN – Nuk jepen të dhëna të tjera.
2.Abdolkhalegh MALEK ZADEH, i datëlindjes 21 Prill 1979. Njihet si “Ferhat”.
3.Erwin ARAM, i datëlindjes 13 Korrik 1974. Njihet si “Alireza NAGHASHZADEH”.
4.Abdulselam TURGUT, i datëlindjes 27 Maj 1967.