Matura Shtetërore, sot testimi i gjuhës së huaj për rreth 27 mijë nxënës

Kete te marte nisin zyrtarisht “ethet” për maturantët, pasi japin testin e parë me detyrim, atë të Gjuhës së Huaj, duke startuar sezonin e provimeve që përfundon më 24 qershor.

Rreth 27 mijë maturantë do t’i nënshtrohen sot provimit të parë të Maturës Shtetërore, ku do të testohen për gjuhën e huaj.

Provimi do të nisë në orën 10:00 dhe do të zgjasë 2 orë e 30 minuta. Janë rreth 145 qendra provimi, ku çdo qendër administrohet nga një përgjegjës administrimi dhe nga administratorë të caktuar për çdo mjedis ku zhvillohet provimi.

Gjithashtu janë të angazhuar më shumë se 640 mësues që do të korrigjojnë testet.

Provimet do të zhvillohen në shkolla që plotësojnë kushtet infrastrukturore të përcaktuara në Rregulloren e Maturës Shtetërore.

Këtë vit Ministria e Arsimit dhe Sportit ka vendosur që të ketë edhe teste të personalizuara për maturantët që janë me aftësi speciale.

Maturantët do t’i nënshtrohen provimit të Gjuhës Shqipe dhe Letërsisë më 10 qershor, Matematikës më 17 qershor dhe provimit me zgjedhje më 24 qershor.

PROVIMI I STANDARTIZUAR

Provimi i standardizuar nis në orën 10:00 njëkohësisht nga 145 qendrat e testimit. Maturantët kanë 2 orë e gjysmë kohë për t’u dhënë zgjidhje pyetjeve me alternativa dhe zhvillim të provimit të gjuhës angleze. Ashtu si dhe vitet e kaluara, teza e provimit hartohet sipas tri niveleve të vështirësisë. Ndërkohë që maturantët nisin procesin më të rëndësishëm për mbylljen e gjimnazit dhe orientimin drejt universiteteve, Rrjeti Akademik Shqiptar po përgatitet për hapjen e portalit “U-Albania”.

“Faza e parapërgatitjeve është hapja e portalit ‘U-Albania’. Çdo vit përsëritet nga e para, pasi ne kemi një databazë që ngarkohet çdo vit nga matura e vitit në përfundim, si dhe maturantët e viteve të kaluara që duan të aplikojnë për në universitet”.

Katër provimet e detyruara të Maturës Shtetërore zhvillohen me një javë distancë nga njëri-tjetri. Pas Gjuhës së Huaj, më 10 qershor do të zhvillohet provimi kombëtar i Gjuhës Shqipe dhe Letërsisë, ndërsa më 17 qershor testi për lëndën e Matematikës. E pasi të rinjtë të kenë marrë disa prej notave të provimeve tëhvilluara, më 24 qershor japin testin e fundit, atë të Lëndës me Zgjedhje, provim që tregon edhe orientimin shoqëror apo shkencor të maturantëve që do të aplikojnë në universitete.

Arjan Xhelaj, kreu i Rrjetit Akademik Shqiptar, tregon se të dhënat e maturantëve do të ngarkohen në sistem në fund të qershorit dhe pas një muaji hapet kalendari i aplikimit për në shkollat e larta, sërish deri në 10 degë të preferuara për çdo kandidat.

“Procesi i aplikimit është gjithmonë fundi i korrikut, duke pasur parasysh që merr një kohë të caktuar procesi i korrigjimeve dhe ankimimeve të provimeve të Maturës Shtetërore. Nga data 29 apo 30 dhe 4-5 gusht është java për të bërë aplikimin në universitet. Nuk ka ndryshuar asgjë në proces, janë po dhjetë preferenca. Maturantët mund të shikojnë në portalin ‘u-Albania’ që është i hapur universitetet dhe programet që ato ofrojnë. Çdo program i ri që na vjen nga Ministria e Arsimit dhe licencohet, hidhet në sistem”, – nënvizon Xhelaj.

Para nisjes së Maturës Shtetërore, ministrja e Arsimit ka kërkuar nga administratorët e provimeve të respektojnë të gjitha rregullat e sigurisë që nga procesi i hapjes së tezës deri në përfundimin e provimit. Referuar të gjitha viteve të kaluara, tezat e provimit janë shpërndarë në rrjetet sociale pas nisjes së Provimeve Kombëtare, ku në disa raste janë publikuar edhe pyetjet e zgjidhura.