Rikthim ëndrrash për Kastriot Imerin/ Kosovari shkëlqen me dy asistime në startin e sezonit te Young Boys

Kastriot Imeri e ka nisur me këmbën e mbarë sezonin e ri në elitën e futbollit zviceran, duke u rikthyer në qendër të vëmendjes me fanellën e BSC Young Boys.

Mesfushori kosovar ishte një nga protagonistët kryesorë në fitoren e skuadrës nga Berna ndaj FC Sion, në një ndeshje që përfundoi me rezultatin 4-2. Imeri dhuroi dy asistime, duke treguar menjëherë ndikimin e tij pas rikthimit te klubi.

26-vjeçari u aktivizua në minutën e 25-të, pasi zëvendësoi Alan Virginiusin, i cili u largua nga fusha për shkak të një dëmtimi. Pavarësisht hyrjes së hershme në lojë, Imeri u bë shpejt një nga figurat kryesore të takimit.

Në minutën e 40-të, ai asistoi për Alvyn Sanches, i cili shënoi golin që i dha Young Boys avantazhin 2-0. Ndërsa në minutën e 66-të, mesfushori kosovar u shfaq sërish në rolin e krijuesit, duke ndihmuar Samuel Essenden të realizonte për rezultatin 3-2.

Ky ishte një rikthim ideal për Imerin, i cili sezonin e kaluar ishte i huazuar te FC Thun, ku zhvilloi një edicion të jashtëzakonshëm. Me Thunin, ai fitoi titullin e kampionit dhe luajti një rol të rëndësishëm në rikthimin e skuadrës në elitën zvicerane.

Tashmë i kthyer te Young Boys, Imeri synon të ketë një rol të rëndësishëm në sezonin e ri, ndërsa paraqitja e parë ka treguar se ai mund të jetë një nga lojtarët kyç të skuadrës nga Berna.