Parashikimi i pabesueshëm i Pedrit bëhet realitet, fotoja e vitit 2025 rikthehet pas kualifikimit në finalen e Botërorit

Kualifikimi i Spanjës në finalen e Kupës së Botës ka sjellë jo vetëm festën e madhe në fushë, por edhe një histori të pazakontë jashtë saj. Një postim i Pedrit në rrjetet sociale nga një vit më parë po rikthehet në vëmendje, pasi tifozët pretendojnë se mesfushori kishte paralajmëruar këtë moment.

Pedri ishte titullar në pesë ndeshjet e para të Spanjës në turne, por në sfidat ndaj Belgjikës dhe Francës humbi vendin në formacion, me trajnerin që zgjodhi Fabian Ruiz në mesfushë.

Kundër Francës, lojtari i Barcelonës u aktivizua vetëm në minutën e 78-të, por pas kualifikimit në finale emri i tij u bë protagonist për një arsye tjetër.

Më 10 qershor 2025, Pedri publikoi në Instagram një foto krah Lamine Yamal dhe Nico Williams. Postimi shoqërohej vetëm me gjashtë numra: 19 07 26.

Një vit më vonë, tifozët kanë lidhur këto shifra me datën e finales së Kupës së Botës, e cila do të zhvillohet më 19 korrik 2026. Spanja tashmë ka siguruar një vend në ndeshjen e fundit të turneut, ku do të përballet me fituesin e çiftit Angli-Argjentinë.

Pas rreth 400 ditësh nga ai postim, numrat e Pedrit janë kthyer në një nga historitë më të komentuara të Botërorit. Shumë tifozë e kanë cilësuar si një “parashikim”, ndërsa të tjerë e shohin si një rastësi që i ka dhënë edhe më shumë ngjyrë rrugëtimit të Spanjës drejt finales.