PAMJET LIVE/ Kampion i Italisë për herë të katërt, Napoli gdhihet në festë (VIDEO)

Festa është kthyer në rrugët e Napolit. Pas 38 javësh të një gare të ethshme, Napoli është shpallur kampion i Serie A për sezonin 2024-2025, duke fituar titullin e katërt në histori. Skuadra e Antonio Contes mposhti Cagliari-n 2-0 në “Stadiumin Diego Armando Maradona” dhe mbylli kampionatin me 82 pikë, vetëm një më shumë se ndjekësi më i afërt, Interi.

Ky nuk është vetëm një titull kampioni, është një rrëfim dashurie mes qytetit dhe futbollit. Napoli ka jetuar sërish ëndrrën, dhe ky sukses i fundit është ndoshta më i ndjeshmi, më i brishti, më njerëzori. Nëse triumfi i tretë simbolizonte dominimin absolut, ky i katërti duket si një fitore në majë të gishtave, e arritur me mund, përkushtim dhe shpirt.

Qyteti ka shpërthyer në një delir kolektiv që përfshin çdo cep të Napolit. Tifozët janë ngjitur në statuja dhe shtylla ndriçimi, si alpinistë të improvizuar që kërkojnë të prekin qiellin bashkë me ëndrrën e përmbushur.

Flamujt kaltër kanë pushtuar sheshet, rrugicat, ballkonet, sepse ky titull nuk është vetëm sportiv, por edhe shpirtëror.

Antonio Conte, i ardhur në verë për të kthyer skuadrën në lavdi, ka ringjallur jo vetëm një ekip, por edhe një ndjenjë të tërë përkatësie. Ai ka dhënë drejtim, energji dhe siguri, dhe tifozët ia kanë kthyer me një dashuri të pastër, napolitane.

SHIHNI PAMJET LIVE NGA NAPOLI