Mark Markez doli me dopietë nga Hungaria, rrëzim masiv në startin e garës së Moto GP

Mark Markez realizoi një fundjavë perfekte në Hungari, duke fituar edhe garën kryesore në pistën e “Balaton Park” dhe duke u rikthyer fuqishëm në garën për titullin në MotoGP. Pas suksesit në Sprint të shtunën, piloti spanjoll i Dukatit zhvilloi një duel spektakolar me Pedro Akostan, të cilin e fitoi në xhirot vendimtare, duke regjistruar fitoren e 100-të në karrierën e tij të jashtëzakonshme.

Akosta mbetet ende në pritje të triumfit të parë në MotoGP, me pilotin e skuadrës KTM që u detyrua të kënaqej sërish me vendin e dytë. Ndërkohë, Françesko Banjaia plotësoi podiumin, duke u renditur i treti. Italiani nuk arriti të sfidonte dy pilotët kryesues, por njëkohësisht nuk u rrezikua nga rivalët pas tij, duke konfirmuar shenjat pozitive të treguara edhe pas podiumit në Muxhelo.

Gara e Marko Bexekit përfundoi që në kthesën e parë. Piloti italian u përfshi në një aksident të shkaktuar nga shoku i tij i skuadrës, Horge Martin, i cili gaboi në frenim dhe shkaktoi një përplasje zinxhir ku u përfshinë edhe Fermin Aldeguer, Raul Fernandez dhe Fabio Di Xhannantonio. Pavarësisht rrëzimit të frikshëm, fatmirësisht asnjëri prej pilotëve nuk pësoi dëmtime serioze. Vetëm Di Xhanantonio arriti të rikthehej në pistë, por pasi humbi shumë kohë, u detyrua të kënaqej me vendin e 12-të. Me këtë incident, gara humbi menjëherë tre pilotët kryesorë të renditjes së përgjithshme.

Megjithatë, ata ruajnë pozicionet e tyre në kampionat, edhe pse tashmë Akosta dhe Markez po afrohen gjithnjë e më shumë dhe përbëjnë një kërcënim serioz në luftën për titull. Luftë e fortë ishte edhe për pozicionet menjëherë pas podiumit. Vendin e katërt e siguroi Ai Ogura, piloti i vetëm i Aprilias që mbijetoi nga incidentet e garës. Japonezi realizoi një tjetër rikuperim mbresëlënës, duke kaluar Luka Marinin në fazën finale të garës. Marini, megjithatë, i dhuroi Hondas një rezultat shumë pozitiv me vendin e pestë. Markez largohet kështu nga Hungaria me maksimumin e pikëve dhe me moral të lartë, duke rihapur plotësisht garën për titullin botëror të MotoGP 2026.