PDK KËRKON RINUMËRIM! Ankesa në PZAP rihap debatin për krizën politike kosovare

Dy kandidatët për deputetë të Partisë Demokratike të Kosovës, kanë dorëzuar ankesë, duke kërkuar rinumërimin e votave dhe kundërshtuar rezultatin përfundimtar të zgjedhjeve. Ata pretendojnë se janë konstatuar gabime në numërim, ndërsa zhvillimi i ri rrezikon të zgjasë procesin e certifikimit dhe të thellojë ngërçin politik në Kosovë.

Procesi zgjedhor në Kosovë mund të marrë një tjetër kthesë. Dy kandidatët për deputetë nga Partia Demokratike e Kosovës, Bekim Haxhiu dhe Qëndrim Kryeziu, kanë dorëzuar ankesë në PZAP- Panelit Zgjedhor për Ankesa dhe Parashtresa, duke kërkuar rinumërimin e votave dhe duke kundërshtuar rezultatin përfundimtar të shpallur nga Komisioni Qendror i Zgjedhjeve.

Sipas tyre, nga rinumërimi i një pjese të votave janë evidentuar gabime në regjistrimin fillestar, çka, sipas PDK-së, e bën të papranueshëm certifikimin e rezultatit aktual.

"Rezultati përfundimtar duhet të jetë i saktë dhe i pakontestueshëm. Po kërkojmë vetëm zbatimin e ligjit dhe rinumërimin e votave."

Kandidatët argumentojnë se diferenca për fitimin e mandatit është shumë e ngushtë dhe se gabimet e konstatuara mund të ndikojnë drejtpërdrejt në ndarjen e ulëseve në Kuvend.

"Çdo votë duhet të numërohet. Nuk kërkojmë asgjë të jashtëzakonshme, por vetëm respektimin e vullnetit të qytetarëve."

Tani pritet vendimi i Panelit Zgjedhor për Ankesa dhe Parashtresa. Nëse urdhëron rinumërimin, procesi i certifikimit të rezultateve mund të shtyhet edhe për disa ditë, duke vonuar më tej konstituimin e institucioneve të reja.

Në rast se ankesat dhe procedurat zgjasin, Kosova rrezikon të përballet me një tjetër bllokadë politike, në një kohë kur skena politike mbetet e fragmentuar dhe partitë ende nuk kanë arritur një marrëveshje për formimin e shumicës parlamentare dhe qeverisë së re.

Ndërkohë, ambasadorët e vendeve perëndimore dhe partnerët ndërkombëtarë kanë bërë thirrje për konsensus politik dhe bashkëpunim ndërmjet partive, duke theksuar se funksionalizimi i institucioneve është i domosdoshëm për avancimin e proceseve integruese të Kosovës, përfshirë rrugën drejt Bashkimit Evropian dhe forcimin e aspiratave euroatlantike.

Vendimi i PZAP-së pritet të përcaktojë jo vetëm fatin e disa mandateve parlamentare, por edhe ritmin e daljes së Kosovës nga ngërçi i ri politik.