Konjufca: Kosova jashtë dialogut me Serbinë, nëse kërkohet Asociacion komunash kundër Kushtetuës

Kryetari i Parlamentit të Kosovës, Glauk Konjufca, tha se nuk ka çfarë të kërkojnë më në dialog me Serbinë nëse faktorët ndërkombëtarë nuk mendojnë që zgjidhja për Asociacionin të jetë sipas Kushtetutës.

“Bile mendoj që nëse faktorët e rëndësishëm ndërkombëtarë, nëse Bashkimi Evropian nuk mendon që zgjidhja të jetë brenda Kushtetutës së Kosovës unë mendoj që Kosova nuk ka çfarë të kërkoj në atë dialog më, kurrfarë interesi Kosova nuk ka në atë dialog. Çka kemi ne interes ta shkatërrojmë kushtetutshmërinë tonë, ajo shkon vetëm në dëm të interesave tona nëse është ashtu”, tha zoti Konjufca.

Konjufca tha se Kosova është në dialog me dy parime, që dialogu është për njohje të ndërsjelltë dhe çdo vendimmarrje sipas Kushtetutës së vendit.

“Kosova a e dini pse është në dialog? Sepse beson shumë në dy principe, principin e parë besojmë që dialogu është për njohje të ndërsjellë dhe arsye numër dy e dimë që çfarëdo rregullimi për të drejtën e serbëve, çfarëdo vet-menaxhimi për të drejtat e serbëve është në kuadër të Kushtetutës së Kosovës. Se nëse është e kundërta, nëse ky proces e ka çmimin e shkatërrimit të shtetit të Kosovës, e minimit të shtetit tonë atëherë është mirë ne të themi mirupafshim sepse nuk ka interes këtu”, tha zoti Konjufca.

Kryeministri i Kosovës, Albin Kurti, në takimin me aleksandër Vuçiç në Brusel nuk pranoi draftin e ngritjes së Asociacionit dhe qeveria e Prishtinës shkarkoi ekipin hartues të përbërë nga katër pjesëtarë të komunitetit serb.

Zbatimi i marrëveshjes për Asociacionin vazhdon të mbetet sfida kryesore për normalizimin e marrëdhënieve ndërmjet Kosovës dhe Serbisë.

dialogu kosove-serbi