Gjyqi ndaj ish-krerëve të UÇK-së, Organizata: Dëshmi e nevojës së vazhdueshme për drejtësi

Gjyqi ndaj ish-drejtuesve të UÇK-së, është parë nga Organizata për të drejtat e njeriut si dëshmi e nevojës së vazhdueshme për drejtësi. Deklarata vjen pak ditë para fillimit të gjykimit ndaj Hashim Thaçi, Kadri Veselit, Rexhep Selimit dhe Jakup Krasniqit.

Organizata për të drejtat e njeriut “Human Rights VVatch” tha të premten se gjykimi i ish-udhëheqësit të Kosovës, Hashim Thaçi dhe tre të tjerëve, Kadri Veselit, Rexhep Selimit dhe Jakup Krasniqit, nën akuzat për krime lufte dhe krime kundër njerëzimit, vë në pah nevojën e vazhdueshme për drejtësi, 24 vjet pas luftës në Kosovë.

Deklarata e organizatës vjen pak ditë para fillimit të gjykimit ndaj ish-drejtuesve të Ushtrisë Çlirimtare të Kosovës.

Procesi ndaj tyre pritet të fillojë të hënën me 3 prill në Gjykatën e Posaçme me seli në Hagë. Drejtori për Evropën dhe Azinë Hugh Williamson, vuri në dukje se ky gjyq është ndaj katër personave të akuzuar për kryerjen e krimeve të tmerrshme gjatë dhe pas luftës, kur luftimet ishin ndalur, duke përfshirë krimet kundër pjesëtarëve të grupeve të ndryshme etnike.

Sipas organizatës “Human Rights Watch”, mbrojtja e dëshmitarëve është veçanërisht e rëndësishme për këtë gjyq duke pasur siç thuhet parasysh sfidat me frikësimin e dëshmitarëve në rastet tjera kundër ish-pjesëtarëve të Ushtrisë Çlirimtare të Kosovës.

“Gjyqi ndaj (Hashim) Thaçit mund të ndihmojë në vendosjen e Kosovës në një rrugë më të qartë drejt drejtësisë dhe sundimit të ligjit pas një historie shtypjeje”, bëri të ditur Williamson.

Ish-drejtuesit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, u arrestuan në nëntor të vitit 2020.

Të gjithë kanë thënë se ndjehen të pafajshëm përballë akuzave të ngritura nga Prokuroria e Posaçme e Kosovës me seli në Hagë, e cila i ngarkon ata për veprat përndjekje dhe burgosje, ndalim arbitrar, akte të tjera çnjerëzore, trajtim mizor, torturë, vrasje, dhe zhdukje me forcë të personave.

Sipas prokurorisë, krimet e pretenduara prej saj, janë kryer midis afërsisht prillit të vitit 1998 dhe gushtit të vitit 1999 në një numër vendndodhjesh në Kosovë dhe Shqipëri.

gjyqi per uck uÇk hashim thaçi kadri veseli jakup krasniqi rexhep selimi