“Ritualet s'janë vetëm formë, por përmbajtje shpirtërore"/ Samarxhi flet për agjerimin 10-ditor pa ujë të Ashures

Në studion e emisionit Ora News ishte i ftuar moderatori dhe Mjeshtri i Madh, Ferdinand Samarxhi, në një bisedë kushtuar ritualeve të Ashures dhe periudhës së agjërimit dhjetëditor pa ujë, një praktikë e njohur në traditën bektashiane.

Gjatë diskutimit u trajtuan elementët shpirtërorë të kësaj periudhe, simbolika e sakrificës dhe rëndësia e saj në jetën fetare dhe kulturore të besimtarëve.

Në fokus të bisedës u vendos edhe roli historik i bektashizmit në Shqipëri dhe prania e Kryegjyshatës Botërore në vend.

“Ne kemi një traditë të hershme shpirtërore ku sakrifica dhe përkushtimi janë pjesë e identitetit tonë fetar. Ashura është një moment reflektimi dhe kujtese për ngjarje të rëndësishme të besimit.”-tha ai.

Gjatë bisedës u theksua se praktika e agjërimit dhe përjetimi i Ashures mbeten elementë që bashkojnë komunitetin dhe ruajnë vazhdimësinë e traditës.

“Ritualet nuk janë vetëm formë, por përmbajtje shpirtërore. Ato krijojnë një lidhje mes besimtarit dhe historisë së tij fetare, duke ruajtur gjallë kuptimin e sakrificës.”-shtoi Samarxhi.

U nënvizua se bektashizmi në Shqipëri vijon të mbetet një pjesë e rëndësishme e trashëgimisë shpirtërore dhe kulturore të vendit, me një rol të veçantë në ruajtjen e traditave dhe dialogut fetar.