VIDEO/ Irani planifikon bisedime me shtetet e Gjirit, fokusi te Hormuzi dhe…

Bisedime pajtimi mes Iranit dhe vendeve të Gjirit pritet të zhvillohen në Riad të Arabisë Saudite, sipas një burimi diplomatik të cituar nga Reuters, i njohur me zhvillimet e negociatave mes SHBA-së dhe Iranit.

Sipas të njëjtit burim, këto takime do të jenë të ndara nga negociatat dypalëshe mes Uashingtonit dhe Teheranit. Bisedimet rajonale do të fokusohen kryesisht në çështje që lidhen me sigurinë detare në Ngushticën e Hormuzit, përfshirë operacionet e pastrimit të minave dhe aktivitetet e ardhshme në këtë korridor strategjik.

Ndërkohë, kryetari i Parlamentit iranian, Mohammad Bagher Ghalibaf, gjatë një vizite në Baku të Azerbajxhanit, deklaroi se siguria në Lindjen e Mesme duhet të jetë përgjegjësi e vetë vendeve të rajonit.

Ai bëri thirrje për zgjerimin e bashkëpunimit mes shteteve fqinje dhe përsëriti qëndrimin e Teheranit se tërheqja e forcave të huaja ushtarake nga rajoni mbetet një objektiv strategjik.

“Ne e shohim të ardhmen e rajonit jo në konfrontim, por në bashkëpunim”, u shpreh Ghalibaf, duke theksuar se prania ushtarake e huaj konsiderohet nga Irani si faktor destabilizues.

Në të njëjtën kohë, Sekretari amerikan i Shtetit, Marco Rubio, zhvilloi bisedime me drejtuesit e Emirateve të Bashkuara Arabe gjatë një vizite në Abu Dhabi.

Sipas Departamentit Amerikan të Shtetit, palët diskutuan marrëveshjen e propozuar mes SHBA-së dhe Iranit, garantimin e lundrimit të sigurt në Ngushticën e Hormuzit dhe rëndësinë e ruajtjes së paqes dhe stabilitetit në rajon.

Vizita e Rubios në vendet e Gjirit konsiderohet pjesë e përpjekjeve diplomatike amerikane për të konsoliduar mbështetjen e aleatëve rajonalë dhe për të çuar përpara procesin e uljes së tensioneve në Lindjen e Mesme.