VIDEO/ Sulm në një bibliotekë në Kaliforni! Dy viktima nga të shtënat me armë, ka edhe të ...

Një sulm me armë zjarri në një bibliotekë në Kaliforninë Veriore ka përfunduar tragjikisht me dy viktima dhe një fëmijë të plagosur lehtë, ndërsa autori i dyshuar është vënë në pranga nga policia.

Ngjarja ndodhi pasditen e së shtunës në Bibliotekën e Qarkut Butte, në qytetin Chico, ku autoritetet morën disa telefonata emergjente për të shtëna dhe njerëz që bërtisnin brenda ndërtesës.

Sipas shefit të Policisë së Chico-s, Billy Aldridge, forcat e rendit ndërhynë menjëherë në vendngjarje. I dyshuari tentoi të largohej nga pjesa e pasme e bibliotekës, por u arrestua pak çaste më vonë nga policët që kishin rrethuar zonën.

“Është një ngjarje jashtëzakonisht e rëndë dhe tronditëse për komunitetin tonë”, deklaroi Aldridge gjatë konferencës për mediat.

Autoritetet konfirmuan se dy persona humbën jetën nga sulmi, ndërsa një fëmijë u dërgua në spital me plagë të lehta. Emrat e viktimave nuk janë bërë ende publikë, pasi familjarët e tyre nuk janë njoftuar zyrtarisht.

Hetuesit nuk kanë dhënë ende informacione mbi motivin e sulmit apo identitetin e autorit, por dyshohet se ai ka vepruar i vetëm.

Ndërkohë, autoritetet lokale u kanë kërkuar qytetarëve të shmangin zonën përreth bibliotekës, ndërsa të gjitha degët e saj do të qëndrojnë të mbyllura deri në përfundimin e hetimeve.