Trump godet Iranin me masa të reja, nafta "shpërthen" me mbi 9%

Tregjet ndërkombëtare të energjisë kanë reaguar me një rritje të fortë të çmimit të naftës, pas vendimit të presidentit amerikan Donald Trump për vendosjen e tarifave të tranzitit në Ngushticën e Hormuzit dhe bllokadës së re ndaj porteve iraniane.

Zhvillimet kanë shtuar shqetësimet për një përshkallëzim të konfliktit në Lindjen e Mesme dhe ndikimin e tij në furnizimin global me naftë.

Nafta Brent e Detit të Veriut për dorëzim në shtator u rrit me 9.59%, duke arritur në 83.30 dollarë për fuçi. Ky është niveli më i lartë i javëve të fundit dhe rritja më e madhe brenda një seance tregtare që nga fillimi i konfliktit.

Edhe nafta amerikane West Texas Intermediate (WTI) për dorëzim në gusht u ngjit me 9.42%, duke u tregtuar në 78.14 dollarë për fuçi.

Sipas analistëve të Eurasia Group, tregjet deri tani kishin vlerësuar se sulmet ndaj anijeve në Ngushticën e Hormuzit nuk do të kishin ndikim të madh në furnizimin global. Megjithatë, tensionet e fundit mes Uashingtonit dhe Teheranit kanë ndryshuar pritshmëritë e investitorëve dhe kanë rritur frikën për ndërprerje të qarkullimit të naftës.

Ndërkohë, bursat amerikane e mbyllën seancën e së hënës me humbje. Indeksi S&P 500 ra me 0.78%, Nasdaq humbi 1.55%, ndërsa Dow Jones u ul me 0.26%, ose rreth 138 pikë.

Nën presion u gjend edhe sektori i teknologjisë dhe i gjysmëpërçuesve. Aksionet e SK Hynix ranë me 9%, Micron Technology me 4%, Sandisk me 12%, Seagate Technology me 5%, AMD me 4% dhe Intel me 6%.

Vëmendja e investitorëve është përqendruar edhe te publikimi i të dhënave të inflacionit në Shtetet e Bashkuara për muajin qershor. Sipas parashikimeve të ekonomistëve, inflacioni pritet të rritet me 0.2% në baza mujore, ndërsa në bazë vjetore të arrijë në 3.8%.