TRAGJEDI NGA TORNADOJA NË KINË! 11 të vdekur dhe mbi 300 të plagosur nga stuhia e fuqishme (VIDEO)

Të paktën 11 persona kanë humbur jetën pasi stuhi të fuqishme goditën provincën Hubei në Kinën qendrore. Moti ekstrem u shoqërua me një tornado të rrallë që shkaktoi dëme të mëdha në disa qytete. Mbi 300 persona janë plagosur, ndërsa mijëra ndërtesa janë dëmtuar nga era e fuqishme dhe fenomeni i pazakontë atmosferik.

Një tornado e fuqishme goditi zonat e banuara në provincën Hubei, duke shkaktuar viktima dhe dëme të konsiderueshme materiale.

Pamjet e publikuara në rrjetet sociale tregojnë momentet kur vorbulla e ajrit përfshiu qytetet Ezhou dhe Huanggang, duke ngritur objekte në ajër, duke dëmtuar ndërtesa dhe duke krijuar panik te banorët.

Sipas mediave shtetërore kineze, fenomeni ishte i rrallë për këtë rajon dhe shkaktoi pasoja të rënda në zonat e prekura.

Autoritetet lokale njoftuan se stuhitë dëmtuan mijëra ndërtesa, ndërsa ekipet e emergjencës u angazhuan për kërkimet, shpëtimin e personave të bllokuar dhe ndihmën për familjet e prekura.

Një student nga qyteti Huanggang tregoi për BBC se në fillim kishte menduar se bëhej fjalë vetëm për një stuhi të zakonshme. Situata ndryshoi kur ai pa objekte që fluturonin jashtë dritares së konviktit ku qëndronte.

Sipas dëshmisë së tij, shumë studentë u plagosën nga xhamat e thyer gjatë përplasjes së fuqishme të erës me ndërtesën. Ai tha se vetëm pasi gjithçka përfundoi kuptoi se kishte kaluar një fatkeqësi natyrore me përmasa të mëdha.

Autoritetet kineze vijojnë operacionet në terren për të vlerësuar dëmet dhe për të ndihmuar banorët që kanë humbur banesat ose kanë pësuar dëmtime në pronat e tyre.

Numri i viktimave dhe i të plagosurve mund të ndryshojë ndërsa ekipet vazhdojnë punën në zonat më të prekura.

Sipas të dhënave zyrtare, tornadoja e fundit e regjistruar në këtë zonë ishte në vitin 2021, duke e bërë këtë ngjarje një prej episodeve më të rëndësishme të motit ekstrem në vitet e fundit për provincën Hubei.