Tragjedi në Florida/ 31-vjeçarja humb jetën pas sulmit nga aligator 3.7 metra gjatë notit në lumë

Një grua 31-vjeçare ka humbur jetën në Florida pasi u sulmua nga një aligator ndërsa po notonte në lumin Econlockhatchee, në Pyllin Shtetëror Little Big Econ. Ngjarja ka shkaktuar reagime të shumta në Shtetet e Bashkuara.

Viktima, Brittany Clark, ndodhej në zonë së bashku me partnerin e saj, Chance Allison, për një shëtitje në natyrë. Sipas autoriteteve, çifti kishte hyrë në ujërat e cekëta për të notuar kur një aligator rreth 3.7 metra i gjatë doli papritur nga uji dhe e sulmoi gruan.

Zyrtarë të Komisionit për Ruajtjen e Peshqve dhe Jetës së Egër të Floridës thanë se ajo u kafshua rëndë në të dyja duart.

Partneri i saj u përpoq ta shpëtonte, duke luftuar me aligatorin dhe duke arritur t’i çlironte njërën dorë. Megjithatë, kafsha e sulmoi sërish, duke i shkaktuar plagë të rënda.

Në një telefonatë emergjence 911, dëshmitarët përshkruan situatën si kritike, duke raportuar humbje të madhe gjaku dhe dëmtime serioze.

Pavarësisht ndërhyrjes së shpejtë të ekipeve mjekësore, 31-vjeçarja ndërroi jetë gjatë transportimit drejt spitalit.

Pas incidentit, autoritetet lokalizuan aligatorin dhe e eliminuan, ndërsa trupi i tij u mor si provë për hetimet.

Sipas mediave amerikane, Brittany Clark ishte e apasionuar pas natyrës dhe aktiviteteve në ambient të hapur dhe kishte punuar për vite si operatore buldozeri.