Tragjedi në Bangkok/ Zjarri në lokal lë 30 viktima, hetimet të çojnë drejt pistës së neglizhencës

Një zjarr i fuqishëm në një lokal në Bangkok ka shkaktuar një tragjedi të rëndë, duke lënë të paktën 30 persona të vdekur dhe dhjetëra të tjerë të plagosur. Autoritetet tajlandeze kanë nisur hetimet për të zbuluar nëse mungesa e masave të sigurisë dhe neglizhenca kanë ndikuar në përmasat e katastrofës.

Sipas dëshmive të të mbijetuarve, disa dyer të lokalit ishin të kyçura dhe daljet e emergjencës nuk ishin të shënuara qartë. Shumë persona u përpoqën të largoheshin nga flakët, por mbetën të bllokuar brenda ambienteve.

Zjarrfikësit gjetën një pjesë të madhe të viktimave në tualetet e pjesës së pasme të lokalit, ku besohet se klientët kishin kërkuar strehim gjatë përhapjes së zjarrit.

Hetimet paraprake sugjerojnë se zjarri mund të ketë nisur nga një problem elektrik në një kondicioner, i cili shkaktoi ndërprerjen e energjisë në të gjithë lokalin. Megjithatë, ekspertët po analizojnë edhe kushtet e brendshme të ambientit.

Sipas inspektimeve të para, dekorimet me materiale shumë të ndezshme, si lule plastike dhe veshje shkumore në tavan, mund të kenë përshpejtuar përhapjen e flakëve.

Të mbijetuarit kanë treguar se zjarri u përhap me shpejtësi të madhe pranë skenës, ndërsa klientët u përpoqën të gjenin rrugët e daljes. Një pjesë e tyre raportuan se ambienti ishte shumë i errët dhe se orientimi drejt daljeve emergjente ishte i vështirë.

Ekspertët e sigurisë kanë konstatuar se një derë pranë zonës së tualeteve ishte e mbyllur me çelës, ndërsa disa hyrje ishin të penguara nga mobilie dhe sende të tjera.

Profesori i inxhinierisë strukturore, Worsak Kanok Nukulchai, ka vlerësuar se shumë viktima mund të kenë humbur jetën nga thithja e gazeve toksike të krijuara nga djegia e materialeve plastike dhe shkumës.

Lokali ishte i regjistruar si restorant me muzikë live dhe jo si ambient argëtimi, çka ka ngritur pikëpyetje mbi standardet e sigurisë që duhej të zbatoheshin.

Administrata e Bangkokut ka nisur rishikimin e rregullave për materialet e përdorura në restorante dhe ambiente argëtimi, ndërsa hetimi vijon për të përcaktuar përgjegjësitë.

Sipas të dhënave të publikuara, pronari i lokalit kishte pasur më herët një tjetër pub në provincën Yasothon, i cili ishte përfshirë gjithashtu nga një zjarr në vitin 2019, por pa viktima.