SHBA kërkon 67 miliardë dollarë për ushtrinë, Pentagoni paraqet paketën në Kongres

Pentagoni i ka kërkuar Kongresit amerikan miratimin e një pakete shtesë financimi prej 67 miliardë dollarësh, me argumentin se fondet janë të nevojshme për të përballuar nevojat ushtarake që lidhen me konfliktin me Iranin.

Gjatë një seance dëgjimore në Kongres, sekretari amerikan i Mbrojtjes, Pete Hegseth, paraqiti kërkesën për financimin shtesë, duke argumentuar se ushtria amerikane ka nevoja të menjëhershme logjistike dhe operacionale për të mbështetur misionet në zhvillim.

Paketa përfshin 1.5 miliardë dollarë për sigurimin e karburantit, me synimin për të mbuluar mungesat që ndikojnë në operacionet ushtarake, si edhe 2 miliardë dollarë për zëvendësimin e pajisjeve të humbura ose të dëmtuara gjatë luftimeve.

Pjesa tjetër e financimit synon të mbështesë gatishmërinë operacionale të forcave të armatosura amerikane dhe të sigurojë vazhdimësinë e misioneve në një periudhë kur situata e sigurisë në Lindjen e Mesme mbetet e tensionuar.