Rusia, investitori më i madh i huaj në Iran, kalon Kinën

Rusia ka kaluar Kinën si investitori më i madh i huaj në Iran, raportoi dje Bloomberg, duke cituar gazetën iraniane Donya-e-Eqtesad.

Sipas informacioneve të gazetës, që nga gushti 2021, Rusia ka investuar në thelb rreth 2.7 miliardë dollarë në dy projekte nafte në provincën Ilam të Iranit. 

Investitorë të tjerë të mëdhenj në Iran sipas të dhënave të gazetës janë Emiratet e Bashkuara Arabe, Afganistani, Turqia dhe Kina.

Pavarësisht aftësive të saj, Kina vitet e fundit ka reduktuar investimet e saj në Republikën Islamike, duke u kufizuar në logjistikën dhe njësitë kufitare të lidhura drejtpërdrejt me eksportet kineze në Iran, shkruan Bloomberg.

Rusia dhe Irani janë kampionët absolut për sa i përket numrit të sanksioneve të vendosura ndaj tyre nga vendet e Perëndimit. 

Kjo është diçka që i bashkon. Moska, për shkak të izolimit të saj ndërkombëtar dhe duke shprehur mirënjohjen e saj për dronët e furnizuar nga Irani, ka zgjeruar në mënyrë aktive bashkëpunimin ushtarak, hapësinor dhe ekonomik me Teheranin vitet e fundit.

Megjithatë, pavarësisht "marrëdhënieve të shkëlqyera me Moskën", siç deklaroi së fundmi ministri i jashtëm iranian, Irani nuk e njeh aneksimin e Krimesë dhe katër rajoneve të Ukrainës.

rusia irani