PROVOKIM RUS NDAJ POLONISË! SHBA: Moska mund të testojë vendosmërinë e NATO-s

Shtetet e Bashkuara kanë paralajmëruar Poloninë se Rusia mund të organizojë një provokim ushtarak në territorin polak për të testuar reagimin e NATO-s dhe për të rritur tensionet në krahun lindor të aleancës. Sipas mediave perëndimore dhe burimeve të sigurisë, skenarët e mundshëm përfshijnë sulme hibride, goditje ndaj infrastrukturës kritike apo edhe një inkursion të kufizuar nga Kaliningradi ose Bjellorusia. Varshava thotë se e merr seriozisht kërcënimin dhe paralajmëron se çdo veprim i tillë do të përballej me një përgjigje të ashpër nga NATO.

Një paralajmërim i fortë nga Uashingtoni për Varshavën.

Shtetet e Bashkuara kanë informuar autoritetet polake se Rusia mund të ndërmarrë një provokim të armatosur ndaj Polonisë, me qëllim testimin e vendosmërisë së NATO-s dhe krijimin e një krize të re sigurie në Evropën Lindore.

Sipas burimeve polake të cituara nga mediat perëndimore, Moska mund të përdorë skenarë të ndryshëm, nga sulmet me dronë dhe raketa ndaj infrastrukturës kritike, deri te një inkursion i kufizuar tokësor nga rajoni i Kaliningradit ose nga Bjellorusia.

Burime të inteligjencës nuk përjashtojnë as një sulm hibrid, ku një grup ushtarësh rusë ose bjellorusë mund të hynte përkohësisht në territorin polak dhe më pas incidenti të paraqitej si një gabim apo aksident teknik.

Sipas të njëjtave burime, objektivi i Kremlinit do të ishte krijimi i përçarjeve brenda aleancës dhe ushtrimi i presionit mbi vendet perëndimore për të reduktuar ose ndërprerë mbështetjen ushtarake dhe financiare për Ukrainën.

Zyrtarët polakë thonë se rreziku merret seriozisht dhe se vendi ka zhvilluar tashmë stërvitje ushtarake për skenarë të tillë. Ndërkohë, aleatët e NATO-s kanë përsëritur se çdo sulm ndaj territorit të aleancës do të konsiderohet sulm ndaj të gjithë anëtarëve të saj.

Edhe pse ekspertët vlerësojnë se Rusia nuk ka aktualisht kapacitetet për një luftë të gjerë kundër NATO-s, për shkak të angazhimit të saj në Ukrainë, një provokim i kufizuar shihet si një skenar i mundshëm në muajt e ardhshëm, duke e mbajtur të lartë nivelin e alarmit në krahun lindor të aleancës.