Mbi 2 mijë objektiva në 96 orë, SHBA zbulon rolin e AI-së së Elon Musk në luftë!

Ushtria amerikane ka përdorur një version të inteligjencës artificiale Grok të zhvilluar nga kompania xAI e Elon Musk për të mbështetur operacionet ushtarake kundër Iranit, sipas një deklarate zyrtare të paraqitur në një proces gjyqësor në SHBA.

Sipas Pentagonit, teknologjia e integruar në sistemin Maven Smart Systems ndihmoi forcat amerikane të godisnin mbi 2,000 objektiva brenda vetëm 96 orëve gjatë operacionit të koduar “Epic Fury”.

Deklarata u bë nga Cameron Stanley, drejtuesi i inteligjencës dixhitale dhe artificiale në Pentagon, i cili e cilësoi përdorimin e modelit “Grok Gov” si një shembull të rritjes së ndjeshme të efikasitetit operacional.

Sistemi Maven, i zhvilluar në bashkëpunim me kompaninë amerikane të teknologjisë Palantir Technologies, përdor inteligjencën artificiale për analizimin e të dhënave, identifikimin e objektivave dhe mbështetjen e planifikimit ushtarak.

Zbulimi erdhi në kuadër të një padie mjedisore kundër kompanisë xAI, e cila po përballet me akuza për ndotje nga qendra e saj e të dhënave Colossus 2.

Pentagoni argumentoi se çdo ndërprerje e funksionimit të këtij objekti mund të ndikojë drejtpërdrejt në aftësitë e sigurisë kombëtare të SHBA-së, pasi superkompjuteri përdoret për trajnimin dhe zhvillimin e sistemeve të inteligjencës artificiale ushtarake.