Marrëveshja SHBA-Iran alarmon Tel Avivin/ Netanyahu njofton mbledhje urgjente të kabinetit izraelit

Kryeministri izraelit Benjamin Netanyahu pritet të mbledhë kabinetin e sigurisë mbrëmjen e së dielës, pas zhvillimeve të fundit në bisedimet mes Shteteve të Bashkuara dhe Iranit për një memorandum mirëkuptimi.

Takimi vjen pasi presidenti amerikan Donald Trump njoftoi se Uashingtoni dhe Teherani janë pranë nënshkrimit të një marrëveshjeje që lidhet me zgjatjen e armëpushimit, rihapjen e Ngushticës së Hormuzit dhe rifillimin e diskutimeve për programin bërthamor iranian.

Sipas mediave izraelite, zyrtarë të lartë në Izrael kanë shprehur shqetësime për përmbajtjen e marrëveshjes, duke vlerësuar se disa prej pikave të saj mund të ndikojnë në interesat e sigurisë së vendit. Po ashtu, raportohet se SHBA ka pranuar disa kërkesa të rëndësishme të Iranit gjatë negociatave.

Trump ka bërë të ditur se marrëveshja ishte planifikuar të nënshkruhej të dielën. Megjithatë, nga ana iraniane ka pasur sinjale se procesi mund të kërkojë më shumë kohë dhe se dokumenti nuk është finalizuar ende.

Agjencia iraniane e lajmeve Fars raportoi se negociatorët iranianë nuk parashikojnë nënshkrimin e memorandumit gjatë së dielës, pasi bisedimet vazhdojnë dhe disa çështje mbeten të hapura.

Ndërkohë, administrata amerikane dhe Irani vijojnë kontaktet për të arritur një marrëveshje përfundimtare, ndërsa zhvillimet po ndiqen me vëmendje nga Izraeli dhe vendet e tjera të rajonit.