Mamdani prezanton planin për dyqane ushqimore publike në Nju Jork/ Premton 30% ulje për produktet bazë

Kryetari i bashkisë së Nju Jorkut, Zohran Mamdani, ka prezantuar planin për hapjen e një rrjeti dyqanesh ushqimore në pronësi të qytetit, me synimin për të ulur kostot e ushqimeve për banorët.

Sipas projektit, dyqanet do të ofrojnë zbritje deri në 30 për qind për produkte bazë si mishi, frutat, perimet dhe artikuj të tjerë ushqimorë, në një përpjekje për të përballuar rritjen e çmimeve në një prej qyteteve më të shtrenjta të Shteteve të Bashkuara.

Plani parashikon hapjen e pesë dyqaneve, nga një në secilën prej pesë lagjeve të Nju Jorkut. Dyqani i parë pritet të hapet në Bronx në fund të vitit 2027, ndërsa objektivi është që të gjitha pikat të jenë funksionale brenda mandatit katërvjeçar të Mamdanit.

“Tridhjetë për qind zbritje është shumë e rëndësishme për banorët e Nju Jorkut. Në qytetin më të pasur në vendin më të pasur në historinë e botës, askush nuk duhet të shqetësohet për mundësinë për të ushqyer familjen e tij”, deklaroi Mamdani.

Administrata e qytetit ka nisur procesin për përzgjedhjen e operatorëve privatë që do të menaxhojnë funksionimin e përditshëm të dyqaneve, ndërsa bashkia do të mbulojë kostot e ambienteve, qirasë dhe taksave të pronës.

Megjithatë, iniciativa ka shkaktuar reagime nga disa pronarë të dyqaneve të vogla ushqimore, të cilët kanë shprehur shqetësimin se nuk do të mund të konkurrojnë me çmimet e subvencionuara nga qyteti.

Mamdani ka sqaruar se dyqanet publike nuk do të synojnë të zëvendësojnë bizneset ekzistuese, duke theksuar se ato do të fokusohen vetëm në ofrimin e ushqimeve më të përballueshme për familjet e Nju Jorkut.

Dyqanet nuk pritet të shesin ushqime të përgatitura, birrë apo produkte duhani, për të shmangur konkurrencën direkte me bizneset e vogla lokale.