Kryeministri i ri britanik heq TVSH-në për faturat e energjisë/ Synon lehtësimin e kostos së jetesës

Qeveria e kryeministrit të ri të Britanisë së Madhe, Andy Burnham, ka njoftuar një nga masat e para ekonomike të mandatit të tij, duke planifikuar heqjen e taksës mbi vlerën e shtuar (TVSH) për faturat e energjisë elektrike për familjet.

Sipas njoftimit nga Downing Street, masa pritet të hyjë në fuqi më 1 tetor dhe synon të ulë barrën financiare për qytetarët, në kuadër të përpjekjeve për të adresuar krizën e kostos së jetesës.

Kostoja e kësaj nisme për vitin financiar do të mbulohet përmes anulimit të programit të identitetit digjital të qeverisë, një projekt me vlerë rreth 1.8 miliardë paund.

Burnham kishte deklaruar më herët se heqja dorë nga skema e identitetit digjital do të ishte një nga veprimet e tij të para si kryeministër. Projekti, i menduar për të krijuar një dokument identifikimi digjital për punonjësit, ishte kritikuar nga disa ligjvënës dhe ishte cilësuar si një nismë e dështuar.

Kryeministri i ri britanik ka premtuar se do të veprojë shpejt për të rikthyer besimin e qytetarëve dhe për të përmirësuar standardet e jetesës pas viteve të vështirësive ekonomike.

“Westminster nuk ka punuar për njerëzit për një kohë shumë të gjatë, ndërsa familjet janë përballur me rritjen e kostos së jetesës. Kjo duhet të ndryshojë”, deklaroi Burnham.