KONFLIKTI NË LINDJEN E MESME/ Ekipet teknike iraniane dhe amerikane do të takohen në Doha në ditët në vijim

Irani dhe Omani kanë zhvilluar në Muscat takimin e parë të një komiteti të përbashkët për Ngushticën e Hormuzit, duke diskutuar menaxhimin e ardhshëm të kësaj rruge strategjike detare, ndërsa në ditët në vijim pritet të mbahen edhe takime teknike mes ekipeve iraniane dhe amerikane në Doha.

Sipas Reuters, ekipet teknike të Iranit dhe SHBA-së do të takohen në Katar për të zbatuar një memorandum mirëkuptimi, ndërsa burime të njohura me procesin thanë se ndërmjetësit kanë krijuar kanale komunikimi për të ulur tensionet mes dy vendeve.

Zëvendësministri i Jashtëm i Iranit për Çështjet Ligjore dhe Ndërkombëtare, Kazem Garibabadi, bëri të ditur se gjatë takimit në Muscat me përfaqësuesit e Omanit u diskutuan të drejtat sovrane të vendeve bregdetare të Gjirit dhe menaxhimi i ardhshëm i Ngushticës së Hormuzit, bazuar në marrëveshjen e përkohshme të arritur këtë muaj mes Teheranit dhe Uashingtonit.

Palët ranë dakord të vazhdojnë dialogun përmes një grupi të përbashkët pune ndërmjet ministrive të tyre të jashtme, me synimin për të përcaktuar mënyrën e menaxhimit të lundrimit, shërbimet që do të ofrohen dhe kostot përkatëse.

Në deklaratën e përbashkët nuk përmendet vendosja e taksave, por referencat për shërbimet dhe kostot kanë lënë hapësirë për interpretime mbi tarifat e mundshme që mund të lidhen me kalimin nëpër Ngushticën e Hormuzit.

Takimi në Muscat u zhvillua me pjesëmarrjen e Kryetarit të Parlamentit iranian Mohammad Bagher Ghalibaf, ministrit të Jashtëm Abbas Araghchi, Sulltanit të Omanit Haitham bin Tariq dhe ministrit të Jashtëm të Omanit, Badr bin Hamad Al Busaidi.

Zhvillimet vijnë pasi ditët e fundit në Zvicër u mbajtën konsultime teknike në kuadër të procesit negociues Iran-SHBA, me synimin për krijimin e një kuadri për një marrëveshje përfundimtare.