Kancelari austriak: BE duhet të shfrytëzojë momentin për të hapur negociata me Putinin!

Kancelari i Austrisë, Christian Stocker, ka bërë thirrje që Bashkimi Europian të përfitojë nga ajo që e cilësoi si një “moment i favorshëm” për të avancuar përpjekjet diplomatike dhe për të hapur kanale komunikimi me presidentin rus, Vladimir Putin, me synimin për t’i dhënë fund luftës në Ukrainë.

Në një intervistë për Financial Times, Stocker mbështeti plotësisht nismat e fundit të Brukselit për të rivendosur kontaktet me Kremlinin, duke theksuar se luftërat nuk përfundojnë me armë, por me diplomaci dhe negociata.

“Ekziston një moment i favorshëm tani”, deklaroi ai, duke iu referuar zhvillimeve në Lindjen e Mesme dhe armëpushimit mes SHBA-së dhe Iranit, që sipas tij mund të rikthejë vëmendjen ndërkombëtare te konflikti në Ukrainë.

Ndërkohë, negociatat e udhëhequra nga Shtetet e Bashkuara për t’i dhënë fund luftës ruso-ukrainase kanë ngecur, duke shtyrë disa vende europiane të shqyrtojnë mundësinë e ndërmarrjes së iniciativave të reja diplomatike.

Stocker theksoi se objektivi i Europës nuk është mbështetja e një lufte të pafundme, por arritja e një paqeje të drejtë dhe afatgjatë. Ai shtoi se më e rëndësishme se kush do ta përfaqësojë Europën në negociata është përmbajtja dhe qëllimi i bisedimeve.

Sipas raportimeve, zyrtarë të lartë të Bashkimit Europian kanë zhvilluar javët e fundit kontakte të kufizuara me përfaqësues të Kremlinit për të hapur kanalet e komunikimit, një lëvizje që ka ngjallur reagime të ndryshme mes vendeve anëtare.

Megjithatë, disa shtete të Europës Veriore dhe Lindore mbeten skeptike ndaj kësaj qasjeje, duke argumentuar se Rusia vazhdon të mbajë qëndrime maksimaliste dhe se presioni ndaj Moskës duhet të vazhdojë.

Nga ana tjetër, Stocker theksoi se presidenti rus duhet të kuptojë se negociatat janë në interesin e tij dhe se një zgjidhje diplomatike mund të sjellë më shumë rezultate sesa vazhdimi i luftimeve në front.

Kancelari austriak foli gjithashtu për ndryshimin e qasjes së Austrisë ndaj neutralitetit, duke theksuar se vendi duhet të forcojë kapacitetet e tij mbrojtëse përballë sfidave të reja të sigurisë në Europë. Ai konfirmoi se Austria është bashkuar si “vëzhguese aktive” në nismën franko-britanike për mbështetjen e Ukrainës, duke marrë pjesë në diskutimet mbi sigurinë europiane pa u përfshirë në dislokime ushtarake.