Fundi i “El Mayo”/ Ish-kreu i Kartelit të Sinaloas dënohet me burgim të përjetshëm dhe 15 miliardë dollarë gjobë

Një nga figurat më të njohura të botës së krimit në Meksikë, Ismael “El Mayo” Zambada, do të kalojë pjesën tjetër të jetës në burg. Ish-kreu i Kartelit të Sinaloas u dënua nga një gjykatë amerikane, dy vite pasi u arrestua në një operacion që e solli në Shtetet e Bashkuara.

Zambada, 76 vjeç, bashkëthemelues i Kartelit të Sinaloas së bashku me Joaquín “El Chapo” Guzmán, pranoi fajësinë për akuzat që lidhen me trafikun e drogës dhe komplotin kriminal. Në kuadër të marrëveshjes së arritur me prokurorinë, ai shmangu dënimin me vdekje, por u përball me burgim të përjetshëm.

Gjykata në Bruklin e shpalli vendimin të hënën, duke e urdhëruar gjithashtu Zambadan të paguajë 15 miliardë dollarë, shumë që përfaqëson fitimet e siguruara nga aktiviteti i trafikut të drogës gjatë viteve të drejtimit të organizatës kriminale.

Gjatë seancës gjyqësore, Zambada foli përmes një përkthyesi në spanjisht dhe kërkoi falje për dëmin e shkaktuar nga veprimtaria e kartelit.

“Dhuna duhet të marrë fund. Shumë jetë humben, familje shkatërrohen dhe të rinj përfundojnë në një cikël që çon vetëm në burg ose vdekje”, u shpreh ai.

Arrestimi i Zambadas ndodhi në vitin 2024, pasi djali i El Chapos, Joaquín Guzmán López, e bindi se po udhëtonin drejt Meksikës veriore për të kontrolluar pista ajrore të fshehta. Avioni i tyre u ul në Teksas, ku autoritetet amerikane e arrestuan liderin e kartelit.

Zambada pranoi rolin e tij në ndërtimin e një rrjeti kriminal që për dekada ka transportuar sasi të mëdha kokaine dhe drogash të tjera drejt Shteteve të Bashkuara. Karteli i Sinaloas konsiderohet një nga organizatat më të fuqishme të trafikut të drogës në botë.

Pas arrestimit të tij, brenda kartelit kanë shpërthyer përplasje mes fraksioneve rivale, duke shkaktuar dhunë dhe zhdukje personash në rajonin e Sinaloas.

Ekspertët vlerësojnë se dënimi i Zambadas nuk pritet të ndryshojë ndjeshëm aktivitetin e kartelit, pasi organizatat kriminale shpesh riorganizohen pas humbjes së liderëve të tyre. Edhe Joaquín “El Chapo” Guzmán, bashkëthemeluesi tjetër i kartelit, po vuan një dënim me burgim të përjetshëm në SHBA.