FRANCË/ Mbi 3 000 njerëz në marshimin e së djathtës ekstreme pas vdekjes së aktivistit 23-vjeçar

Rreth 3 200 persona morën pjesë në një demonstratë të udhëhequr nga grupet e së djathtës ekstreme dje në Francë, pas vdekjes së një aktivisti nacionalist që u dhunua për vdekje në qytetin e Lionit, sipas “Euronews”.

Presidenti Emmanuel Macron bëri thirrje për qetësi përpara marshimit në nder të Quentin Deranque, 23 vjeç, i cili vdiq javën e kaluar në spital, si pasojë e dëmtimeve në tru.

Demonstrata u zhvillua nën masa të rrepta sigurie, me një prani policore të theksuar, edhe pse nuk u regjistruan incidente madhore.

“Ky është një moment përkujtimi dhe respekti për këtë bashkëpatriot të ri, për familjen e tij dhe të dashurit. Kjo duhet të jetë kryesorja, më pas vjen momenti i përgjegjësisë”, tha Macron.

Të paktën shtatë persona po përballen me akuza paraprake lidhur me vdekjen.

Zyra e prokurorit në Lion kërkoi që secili prej tyre të akuzohet për vrasje të qëllimshme, dhunë në rrethana të rënda dhe komplot kriminal.

Akuzat në fjalë u ngritën ndaj gjashtë prej të arrestuarve. I shtati u akuzua për bashkëpunim në vrasje të qëllimshme, dhunë dhe komplot kriminal.

Deranque u sulmua gjatë një përleshjeje që nisi mes mbështetësve të së djathtës dhe së majtës ekstreme në kuadër të një takimi studentor, ku ligjvënësja ekstremiste, Rima Hassan mbajti një fjalim.

Macron shtoi se do të organizonte një takim me ministrat e tij javën e ardhshme për të kryer një analizë gjithëpërfshirëse mbi grupet e dhunshme të lidhura me partitë politike.