BE-ja do t'u japë mbrojtje të përkohshme të gjithë refugjatëve që ikin nga konflikti në Ukrainë

Bashkimi Evropian do t'u japë mbrojtje të përkohshme të gjithë refugjatëve që ikin nga konflikti në Ukrainë, sipas Komisioneres për Çështjet e Brendshme të bllokut, Ylva Johansson.

Johansson e bëri njoftimin në një postim në Twitter të enjten, duke e quajtur atë një vendim historik.

Ndërsa Ministri i Brendshëm francez Gérald Darmanin dha detaje të mëtejshme se si do të ofrohet mbrojtja në një deklaratë për shtyp.

"Kjo pajisje do të lejojë vendet anëtare të BE-së t'u ofrojnë personave që ikin nga konflikti në Ukrainë një përgjigje të përshtatur me situatën e tyre. Personat e kualifikuar mund të përfitojnë nga një status mbrojtës i ngjashëm me atë të refugjatit, në çdo vend të BE-së për një periudhë njëvjeçar” -  thuhet në deklaratë.

Ministrat e BE u takuan të enjten për të aktivizuar Direktivën 2001/55/CE, e cila ofron mbrojtje të përkohshme në rastin e një fluksi masiv të personave të zhvendosur.

Presidenca franceze e Këshillit të Bashkimit Evropian dhe Komisioni Evropian përshëndetën vendimin, duke thënë se ai pasqyron angazhimin e plotë të BE-së për të treguar solidaritet ndaj Ukrainës dhe për të marrë detyrën e saj ndaj viktimave të kësaj lufte të pajustifikueshme.

“Bashkimi Evropian do të vazhdojë të bëjë gjithçka për të ndihmuar Ukrainën dhe viktimat e luftës”, - theksoi Darmanin.

Komisioneri i Lartë i OKB-së për Refugjatët, Filippo Grandi e quajti vendimin e BE-së të paprecedentë.

Ka pasur më shumë se një milion të ardhur refugjatë ukrainas që nga fillimi i pushtimit rus më 24 shkurt, sipas përditësimit të fundit nga Agjencia e OKB-së për Refugjatët.