Bashkëshortja e kryeministrit Pedro Sanchez del përpara gjykatës për korrupsion

Një gjykatë në Spanjë ka vendosur që Begoña Gómez, bashkëshortja e kryeministrit Pedro Sánchez, të përballet për akuza korrupsioni, ndërsa i është ndaluar largimi nga vendi.

Gómez, 55 vjeçe, akuzohet për shpërdorim fondesh, ushtrim ndikimi të paligjshëm, korrupsion në marrëdhënie biznesi dhe përvetësim të parave publike. Ajo i ka mohuar vazhdimisht të gjitha akuzat.

Hetimi ndaj saj nisi pas një ankese të paraqitur nga organizata “Manos Limpias” (Duar të Pastra), një grup që mediat spanjolle e lidhin me qarqe të ekstremit të djathtë.

Gjyqtari Juan Carlos Peinado urdhëroi sekuestrimin e pasaportës së Gómez, ndalimin e daljes nga Spanja dhe detyrimin e saj për t’u paraqitur në gjykatë dy herë në muaj. Data e gjyqit ende nuk është bërë publike dhe çështja do të shqyrtohet nga një juri.

Kryeministri Sánchez e ka cilësuar vazhdimisht procesin ndaj bashkëshortes së tij si një sulm politik të motivuar dhe pa baza. Ai ka akuzuar kundërshtarët politikë dhe një pjesë të mediave për fushatë kundër familjes së tij, duke vënë gjithashtu në dyshim paanshmërinë e disa përfaqësuesve të sistemit gjyqësor.

Pas vendimit të gjykatës, Partia Socialiste Spanjolle reagoi menjëherë duke deklaruar se Begoña Gómez është përballur prej dy vitesh me “përndjekje politike dhe gjyqësore”, ndërsa vendimin e fundit e cilësoi si një tjetër hap në këtë proces.

Çështja është pjesë e një sërë hetimesh për korrupsion që po ushtrojnë presion mbi qeverinë e Sánchez. Edhe pse vetë kryeministri nuk është nën hetim, vëllai i tij, David Sánchez, akuzohet për ushtrim ndikimi të paligjshëm, ndërsa ish-ministri i Transportit, José Luis Ábalos, dyshohet për përfitime të paligjshme nga kontrata publike. Të dy kanë mohuar akuzat.

Ndërkohë, një tjetër hetim i ndjeshëm ka në fokus ish-kryeministrin José Luis Rodríguez Zapatero, i cili po hetohet për akuza të ngjashme lidhur me ushtrimin e ndikimit. Zapatero ka mbrojtur pafajësinë e tij gjatë seancave të fundit gjyqësore.