Alarm në Gjermani/ Industria humb 15 mijë vende pune çdo muaj: Sektori në krizën më të thellë të dekadës

Industria gjermane po kalon një nga periudhat më të vështira të viteve të fundit, ndërsa ritmi i humbjes së vendeve të punës ka arritur nivele alarmante. Sipas Federatës së Industrisë Gjermane (BDI), rreth 15 mijë vende pune zhduken çdo muaj, duke ngritur shqetësime serioze për të ardhmen e ekonomisë më të madhe të Evropës.

Drejtoresha e BDI-së, Tanja Gönner, e cilësoi situatën si "kritike", duke theksuar se industria gjermane po përballet me një kombinim sfidash që po gërryejnë konkurrueshmërinë e saj në tregjet ndërkombëtare.

Sipas saj, tarifat e vendosura nga Shtetet e Bashkuara, konkurrenca e fortë dhe e deformuar nga tregu kinez, si edhe kostot e larta të prodhimit brenda Gjermanisë, po ushtrojnë presion të madh mbi kompanitë industriale.

Të dhënat më të fundit tregojnë se punësimi në sektorin e prodhimit ka rënë në nivelin më të ulët të dekadës. Vetëm gjatë 12 muajve të fundit janë humbur rreth 174 mijë vende pune, ndërsa shumica e kërkesave për skema të punës me orar të shkurtuar vijnë pikërisht nga kompanitë industriale.

Ekspertët paralajmërojnë se dobësimi i industrisë, e cila për dekada ka qenë motori kryesor i ekonomisë gjermane, mund të ketë pasoja të rënda për rritjen ekonomike, investimet dhe tregun e punës, duke thelluar më tej sfidat me të cilat po përballet Gjermania.