Shoqata Tirana thirrje politikës: Rrezikohet konflikt civil, palët ti japin fund krizës

Vendi rrezikon konflikt civil të pashmangshëm, ndaj palët duhet ti japin fund krizës politike. Kjo është deklarata që bëri shoqata Tirana, teksa i kërkon edhe Presidentit të Republikës që të ndërhyjë për të shmangur përkeqësimin e situatës.

Shoqata Tirana i ka bërë sërish thirrje palëve politike që ti japin fund krizës. Kreu i kësaj shoqate, Arben Tafaj tha se kjo situatë nëse vazhdon e tillë ka rrezik për një konflikt civil.

Arben Tafaj:  Bindja e palëve politike se çdo veprim i tyre është legjitim nuk prodhon asgjë tjetër veçse një rritje te rrezikut për një konflikt civil të pashmangshëm.  Një konflikt i tillë do të deligjitimonte të gjithë palët, pavarësisht pozitave të tyre dhe do ti bënte përgjegjësi për pasojat.

Tafaj shtoi se presidenti i Republikës duhet të ndërhyjë për të shmangur përkeqësimin e situatës.

Arben Tafaj:  Një tryezë e të gjithë palëve do të ishte hapi i parë i domosdoshëm, për rivendosjen e disa ekuilibrave fillestare në komunikimin politik të vendit. Nëse kjo tryezë dështon, atëherë ndoshta vetëm dorëheqja e Presidentit mund ti shërbejë synimit për fillimin e një dialogu në kushtet e një krize totale.

Forumi qytetar i shoqatës Tirana fton çdo organizatë qytetarë që ti bashkohet misionit për të parandaluar ngjarje që mund të shndërrohen në një kujtesë të hidhur kombëtare për shqiptarët.