Të shtëna me a*më në Vlorë/ 30-vjeçari u qëllua në këmbë, autori "ia mbath" me motor

Një plagosje me armë zjarri dyshohet se ka ndodhur pak minuta më parë në Vlorë, pranë rrethrrotullimit të Çoles, në lagjen “24 Maji”.

I plagosuri dyshohet të jetë qëlluar në këmbë dhe është transportuar me urgjencë drejt spitalit të Vlorës, ku po merr ndihmën mjekësore.

Burime paraprake bëjnë me dije se autori i dyshuar është larguar nga vendngjarja me motor, ndërsa dyshohet se i plagosuri është rreth 30 vjeç dhe sapo kishte dalë nga një prej lokaleve të zonës.

Policia po vijon hetimet për identifikimin dhe kapjen e autorit, si dhe për zbardhjen e plotë të motivit të ngjarjes.

NJOFTIMI I POLICISË:

Rreth orës 18:30, në lagjen “24 Maji”, dyshohet se, pas një konflikti ndërmjet shtetasve T. A., 55 vjeç, dhe K. L., 27 vjeç, ka mbetur i plagosur me armë zjarri në këmbë shtetasi K. L.

Shërbimet e Policisë kanë shkuar menjëherë në vendngjarje dhe vijojnë kontrollet intensive për lokalizimin dhe kapjen e shtetasit T. A., autorit të dyshuar të plagosjes.

Shtetasi K. L. ndodhet nën kujdesin e mjekëve dhe është jashtë rrezikut për jetën.

Grupi hetimor, nën drejtimin e Prokurorisë, vijon veprimet për sqarimin e rrethanave dhe dokumentimin ligjor të ngjarjes.