Sekuestrohen 11 kg lëndë narkotike dhe një kallashnikov, arrestohet 1 person në Krujë

Një person është arrestuar dhe një tjetër është proceduar pasi kishin përshtatur një ambient në fashtin Mafsheq të Krujës për tharjen e bimëve narkotike. U sekuestruan 11 kg lëndë narkotike, 1 kallashnikov dhe municion luftarak. 

Njoftimi i policisë Krujë:

Finalizohet operacioni policor i koduar "Outside", për goditjen e veprimtarive kriminale në fushën e narkotikëve.

Kishin përshtatur një ambient, në fshatin Mafsheq, për tharjen e bimëve narkotike, vihet në pranga 1 shtetas, procedohet penalisht një tjetër. Shpallet në kërkim bashkëpunëtori i tyre.

Sekuestrohen 11 kg lëndë e dyshuar narkotike në proces tharjeje, 1 armë zjarri kallashnikov dhe municion luftarak, që u gjetën të fshehura në afërsi të ambientit ku thaheshin bimët narkotike.

Shërbimet e Komisariatit të Policisë Krujë, në vijim të punës për garantimin e rendit dhe sigurisë, evidentimin dhe goditjen e veprimtarive kriminale, kapjen në flagrancë të shtetasve që kryejnë vepra penale, kontrolleve të ushtruara për parandalimin e veprimtarisë kriminale të kultivimit të bimëve narkotike, bazuar në informacionet e siguruara, kanë organizuar dhe finalizuar operacionin policor të koduar "Outside".

Si rezultat i këtij operacioni u bë arrestimi në flagrancë i shtetasit A. M., 31 vjeç, banues në Domje, si dhe nisi procedimi në gjendje të lirë për një të mitur 16 vjeç, banues në Fushë Krujë. Gjithashtu u shpall në kërkim shtetasi O. C., 20 vjeç, banues në Fushë Krujë.

Këta 3 shtetas kishin përshtatur një ambient në afërsi të banesës së shtetasit A. M., në fshatin Mafsheq, për tharjen e bimëve narkotike.

Gjatë kontrollit në këtë ambient, shërbimet e Policisë gjetën rreth 11 kg lëndë të dyshuar narkotike kanabis dhe disa bimë në proces tharjeje, të cilat u sekuestruan në cilësinë e provës materiale, së bashku me 1 armë zjarri, që u gjet e fshehur gjatë kontrollit të ambientit në afërsi të bimëve narkotike.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.