Kapja e pistoletave në Durrës, çfarë deklaroi shoferi i furgonit për policinë, SPAK merr në dorë hetimet

Prokuroria e Posaçme SPAK ka marrë në dorë hetimin për kapjen e 8 pistoletave tip "Glock" në portin e Durrësit.

Dy prokurorë të SPAK, aktualisht janë angazhuar për kryerjen e hetimeve të mëtejshme, duke shmangur në këtë çështje prokurorinë e Durrësit.

Deri më tani rezulton se 8 pistoletat "Glock" janë vendosur në një kuti kartoni e mbyllur me natriban.

Armët janë pikasur fillimisht nga skaneri i portit të Durrësit, ndërsa pas marrjes së njoftimit SPAK ka ndërhyrë pasi trafikimi i armëve ishte pikasur më parë përmes përgjimeve dhe informacioneve policore.

Policia dhe SPAK, deri në këto momente po mbajnë të shoqëruar dhe ende nuk kanë arrestuar shofetin e furgonit Jetmir Koloshi.

Ndërsa policia është vënë në kërkim të administratorit të kompanisë që kryen transportin e mallrave nga Shqipëria në drejtim të vendeve të Bashkimit Europian dhe Britaninë e Madhe.

Sipas dëshmisë së shoferit Jetmir Koloshi, kutinë e kartonit ku u gjetën armët e zjarrit, e ka sjellë në pikën e grumbullimit një person i panjohur, duke i thënë që ta çonte tek një person në Angli.

Burime për Ora News bëjnë me dije se shoferi i ka pohuar policisë se personi i panjohur i ka thënë se brenda në kuti kishte ushqime për një mikun e familjes që jeton në Angli.

Në kuti është lënë shënim adresa e destinacionit dhe një numër telefoni pritës në Angli.Të dyja këto detaje janë duke u verifikuar tashmë.

Ndërsa SPAK, ka mbëritur mbrëmjen e sotme në pikën e grumbullimit të pakove ku agjensia e transportit disponon.

Me shpresën e zbulimit të autorit të këtij trafiku armësh, policia ka kërkuar në zonë për gjetjen e pamjeve filmike të kamerave,për të identifikuar njeriun që çoi tek agjensia kutinë postare.

Për këtë rast SPAK, ka pasur informacion dhe dosja tashmë regjistruar për akuzën e "Trafikut të armëve" kryer në formën e "Grupit të Strukturuar Kriminal".

Shenim: *Ky është artikull ekskluziv i Ora News, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Artikulli mund të ripublikohet nga mediat e tjera vetëm duke cituar “Ora News” bashkëngjitur me linkun e artikullit origjinal.

durrës furgoni me pistoleta