“Jam dëshmitar i asaj që ka bërë Dritani”/ Ndrenika zbardh detaje nga roli i Dritan Goxhës dhe lidhjet me strukturat e UÇK-së

Në një lidhje direkte për emisionin “Ora e Betit”, gazetari Denion Ndrenika ndau kujtime dhe vlerësime për zhvillimet gjatë dhe pas luftës së Kosovës, duke u ndalur te roli i Dritanit dhe angazhimi i tij në strukturat ushtarake të kohës.

Ndrenika tha se ka njohje të hershme me personazhet e përfshirë në ato ngjarje dhe se ka qenë dëshmitar i veprimtarisë së Dritanit në periudha të rëndësishme për organizimin e forcave shqiptare në Kosovë.

"Kam një njohje shumë të vjetër dhe jam shumë i qartë. E kam shkruar edhe publikisht që jam dëshmitar i punëve që ka bërë Dritani atje. Kemi qenë në kohë dhe rrethana të vështira, por aktiviteti i tij ka qenë i dukshëm."-tha ai.

Gjatë bisedës, ai kujtoi se pas përfundimit të luftës, Dritani mori detyrën e komandantit të regjimentit të helikopterëve të Trupave Mbrojtëse të Kosovës, ndërsa figura të tjera të UÇK-së u përfshinë në drejtimin e strukturave të TMK-së.

Ndrenika përmendi gjithashtu se Shpëtim Golemi, i njohur si Dilaver Goxhaj, mbante postin e zëvendësshefit të Shtabit të Përgjithshëm, duke e lidhur këtë me zhvillimet dhe organizimin e forcave në atë periudhë.

"Për të gjitha këto që them ka fakte dhe vërtetueshmëri. Veprimtaria e Dritanit lidhet edhe me kohën kur bëheshin përpjekjet e para për të afruar dhe bashkuar UÇK-në me FARK-un, në një periudhë kur në terren kishte ndarje dhe zhvillime të ndërlikuara."-shtoi ai.

Sipas Ndrenikës, për të kuptuar historinë e luftës dhe të pasluftës në Kosovë, është e nevojshme të analizohen jo vetëm ngjarjet në front, por edhe proceset që ndikuan në organizimin dhe bashkërendimin e forcave shqiptare gjatë asaj kohe.