Derrat e egër “pushtojnë” Karaburunin, PAMJE të rralla nga natyra e virgjër

Pamje të rralla dhe mjaft mbresëlënëse kanë ardhur nga Karaburunit, ku një tufë derrash të egër është filmuar teksa lëviz e lirë në habitatin e saj natyror.

Në video shihen kafshët duke përshkuar qetësisht një zonë pranë masivit pyjor, larg çdo ndërhyrjeje njerëzore, duke reflektuar qartë pasurinë e jashtëzakonshme faunistike që karakterizon këtë zonë të mbrojtur. Prania e tyre është një tregues i drejtpërdrejtë i ekuilibrit ekologjik dhe biodiversitetit që ende ruhet në Karaburun.

Pamje të tilla po bëhen gjithnjë e më të rralla, çka shton nevojën për vëmendje më të madhe nga institucionet përgjegjëse për mbrojtjen e faunës së egër. Ndërkohë, qytetarë dhe dashamirës të natyrës apelojnë për rritje të monitorimit të territorit, në mënyrë që këto specie të mbrohen nga gjuetia e paligjshme apo çdo formë tjetër dëmtimi.

Karaburuni vijon të mbetet një nga zonat më të rëndësishme natyrore në Shqipëri, ku fauna e egër jeton ende në gjendje të lirë dhe të paprekur. Ruajtja e këtij ekosistemi nuk përbën vetëm detyrim ligjor, por edhe një përgjegjësi të përbashkët për të mbrojtur trashëgiminë natyrore që i lihet brezave të ardhshëm.