Oslo pritje madhështore për heronjtë e Norvegjisë, mbi 90 mijë tifozë nderojnë yjet e tyre

Oslo u kthye mbrëmjen e së martës në një festë të madhe për kombëtaren e Norvegjisë, e cila u rikthye në shtëpi pas arritjes së rezultatit më të mirë në historinë e saj në Kupën e Botës, duke siguruar një vend në çerekfinale.

Rreth 90 mijë tifozë u mblodhën në kryeqytetin norvegjez për të përshëndetur ekipin kombëtar. Kulmi i festimeve u zhvillua në sheshin përpara Pallatit Mbretëror, ku u organizua edhe rituali tashmë i famshëm “Viking Row”. Atmosferën e ndezi vetë princi trashëgimtar Haakon, i cili drejtoi turmën duke rënë daullen dhe duke udhëhequr thirrjet ritmike të lojtarëve dhe tifozëve.

Kapiteni i Norvegjisë, Martin Ødegaard, nuk e fshehu emocionin për pritjen madhështore.

“Është thjesht e pabesueshme të shohësh gjithë mbështetjen që po marrim dhe sa shumë i gjithë vendi është pranë nesh. Ka vetëm gëzim, buzëqeshje dhe atmosferë fantastike. Është vërtet e mrekullueshme”, deklaroi ai për transmetuesin publik norvegjez NRK.

Pas uljes në aeroport, futbollistët hipën menjëherë në autobusin që i çoi drejt vendit ku u zhvilluan festimet. Gjatë gjithë itinerarit, mijëra tifozë të veshur me fanellat e kombëtares dhe duke valëvitur flamujt norvegjezë i përshëndetën me entuziazëm.

Në vëmendje ishte edhe ylli i skuadrës, Erling Haaland, i cili zbriti nga avioni duke mbajtur në duar një “Whiskey Raccoon”, një rakun të balsamosur që mban një shishe uiski. Sulmuesi mori pjesë në pritjen zyrtare të organizuar nga Mbreti Harald për të uruar kombëtaren për suksesin historik, por nuk ishte i pranishëm në festën e madhe të organizuar në sheshin kryesor të Oslos.