"Franca, Gjermania dhe SHBA mes favoritëve"/ Pano: Turqia zhgënjim i madh

Në emisionin “Sport Focus” ishte i ftuar ish-futbollisti Ledio Pano, i cili komentoi ecurinë e Kampionatit Botëror, skuadrat favorite dhe ekipet që kanë zhgënjyer deri tani në kompeticion.

Gjatë diskutimit, Pano vlerësoi Francën si një nga skuadrat më të forta të turneut, duke theksuar se thellësia e skuadrës i jep asaj shumë alternativa cilësore në çdo repart.

Ai përmendi gjithashtu Gjermaninë si një ekip tradicionalisht të fortë, që zakonisht arrin në fazat e avancuara të turneve të mëdha, si dhe Shtetet e Bashkuara të Amerikës, të cilat sipas tij po tregojnë potencial të madh, sidomos duke përfituar edhe nga avantazhi i fushës.

Në studio u fol edhe për ekipet surprizë të këtij Botërori, ku u nënvizua mundësia që disa skuadra të arrijnë deri në fazat çerekfinale apo gjysmëfinale.

Një pjesë e analizës u fokusua te Turqia, e cila sipas Panos ka zhvilluar ndeshje të mira dhe ka dominuar në disa momente, por nuk ka arritur të konkretizojë rastet.

Ai përmendi se skuadra ka krijuar shumë raste dhe ka goditur shtyllat, por është ndëshkuar në momentet vendimtare, duke e konsideruar këtë një mungesë fati dhe një zhgënjim për tifozët.

Pano shtoi se Turqia ka në përbërje lojtarë cilësorë që aktivizohen në klube të mëdha europiane, por kjo nuk mjaftoi për të shmangur eliminimin.

Në fund të analizës u prek edhe mungesa e Italisë në këtë Botëror, duke u cilësuar si një humbje e rëndësishme për historinë dhe cilësinë e futbollit ndërkombëtar, pavarësisht formës së saj të dobët në vitet e fundit.