Ferrari më në fund fiton/ “Kokëkuqja” triumfon papritur në Çmimin e Madh britanik

Një dramë, një tronditje dhe një fat krejt i kundër. Çmimi i Madh i Formula 1 në Britaninë e Madhe meritoi të krahasohej me një film nga ata të ankthit deri në horror, ndërsa përmbysjet nisën që në metrat e para dhe nuk ndaluan deri në fund.

Ferrari u kthye tek fitorja tri javë pasi ia doli edhe në Spanjë, ndonëse emri i fituesit ishte i ndryshëm. Këtë herë, Sharl Lëklerk nga Principata e Montekarlos, ndërsa në 14 qershor ia doli anglezi Ljuis Hamilton.

Dyshja e “kokëkuqes” italiane e lanë pas yllin e ri të Formula 1, Kimi Antonelin që u vonua në start me Mercedesin e tij. Gjithsesi, shtatë herë kampioni I botës u nis fare pak përpara kohe dhe u dënua me 5 sekonda ndalesë, që e shleu kur ndërroi gomat.

Duelet ishin të forta dhe parakalimet të shumta, për shkak edhe të ndryshimeve në makinat e këtij sezoni. Antoneli arriti shpejt në vendin e dytë, dhe u desh kohë e gjatë për të kaluar edhe Lëklerkun.

Nga ana tjetër, katër herë kampioni I botës, Maks Verstapen, sërish e pati të vështirë. “Holandezi fluturues” nuk ka më Red Bullin që dominonte, dhe u detyrua të zbriste në hierarki edhe pse luftoi fort.

Pa u mbushur 50 xhiro humbi kontrollin dhe doli nga gara. Drama u bë e plotë kur Antoneli pati probleme mekanike në makinë dhe humbi jo vetën vendin e parë, por edhe mundësinë për pikë.

Përfitoi Ferrari me Lëklerkun të parin e Hamiltonin të tretin, ndërsa Rasëll i Mercedesit doli i dyti. Pas 9 garave këtë sezon, Antoneli sërish kryeson me 179 pikë, por Rasëll është vetëm 25 pikë prapa, dhe Hamilton 32. Për skuadrat, Mercedes kryeson me 333 pikë ndaj 255 të Ferrarit.