Kina teston një raketë strategjike nga një nëndetëse bërthamore në Paqësor

Ushtria kineze njoftoi sot se ka kryer me sukses një test të një rakete strategjike të lëshuar nga një nëndetëse me energji bërthamore në oqeanin Paqësor, duke e cilësuar operacionin si pjesë të stërvitjeve të rregullta ushtarake.

Sipas marinës kineze, raketa mbante një kokë luftarake të rreme dhe goditi zonën e paracaktuar të objektivit.

Autoritetet nuk zbuluan datën e saktë të testit apo detaje të tjera teknike, një veprim i pazakontë duke pasur parasysh se Pekini rrallë publikon informacione për testime të tilla.

Ushtria theksoi se lëshimi ishte pjesë e programit vjetor të stërvitjeve ushtarake, ishte kryer në përputhje me të drejtën ndërkombëtare dhe se vendet përkatëse ishin njoftuar paraprakisht.

Pekini shtoi se testi nuk ishte i drejtuar kundër ndonjë shteti të caktuar.

Megjithatë, testi shkaktoi reagime në rajon.

Ministrja e Jashtme e Australisë, Penny Wong, deklaroi se Kanberra ia kishte bërë të qartë Kinës se një provë e tillë konsiderohet destabilizuese për sigurinë rajonale.

Edhe Japonia shprehu shqetësim për aktivitetet ushtarake të Kinës.

Ministria japoneze e Mbrojtjes njoftoi se i kishte paraqitur Pekinit rezervat e saj lidhur me zhvillimet e fundit ushtarake.

Kina publikon shumë rrallë informacione për testimet e raketave balistike, disa prej të cilave janë të afta të mbajnë koka bërthamore.

Në shtator të vitit 2024, vendi kreu për herë të parë pas disa dekadash një test të një rakete balistike ndërkontinentale me një kokë luftarake të rreme, e cila u lëshua në Paqësor dhe tërhoqi vëmendje ndërkombëtare.

Ndërkohë, Kina nisi sot edhe stërvitjet e përbashkëta detare me Rusinë pranë qytetit port të Qingdao.

Sipas Ministrisë kineze të Mbrojtjes, manovrat vjetore synojnë forcimin e bashkëpunimit dhe reagimin e përbashkët ndaj kërcënimeve për sigurinë detare.