Befason Chelsea… po punon për të nënshkruar me Jordan Henderson nga Brentford

Klubi nga Stamford Bridge është pretendenti kryesor për të nënshkruar me Hendersonin, me disa skuadra të Premier Ligës të interesuara për një transferim të 36-vjeçarit.

Brentford është gati t’i japë Hendersonit një transferim të lirë, pavarësisht se ai ka edhe një vit të mbetur sipas kushteve që nënshkroi kur u bashkua si lojtar i lirë nga Ajax verën e kaluar.

Henderson ishte pjesë e skuadrës së Anglisë të drejtuar nga Thomas Tuchel në Kupën e Botës këtë vit, por pësoi një thyerje të krahut të majtë, pasi rrëshqiti ndërsa ngjitej mbi një tabelë reklamuese gjatë fitores së skuadrës së tij ndaj Meksikës në Estadio Azteca në 1/8 e finales dhe iu desh t'i nënshtrohej një ndërhyrjeje kirurgjikale.

Pasi u përqendrua në rekrutimin e lojtarëve më të rinj në sezonet e fundit, Chelsea ka kërkuar emra më me përvojë këtë verë. 

Më herët të hënën, The Athletic raportoi se ata po shqyrtonin një transferim të sulmuesit të Brighton & Hove Albion, Danny Welbeck, 35 vjeç, ndërsa më parë kishin synuar mesfushorin e Sunderland, Granit Xhaka, por një ofertë prej 8 milionë funtesh për 33-vjeçarin u refuzua. Chelsea gjithashtu ka shprehur interes për 32-vjeçarin John Stones.

Henderson luajti 22 ndeshje si titullar për Brentford sezonin e kaluar, duke u shfaqur edhe 10 herë si zëvendësues. Ai kishte luajtur 57 ndeshje për Ajax midis viteve 2023 dhe 2025.

Lojtari i kombëtares angleze kaloi nëpër akademinë e Sunderland përpara se t’i bashkohej Liverpoolit në vitin 2011. Henderson kaloi 12 sezone në Anfield, duke u bërë kapiten i Liverpoolit dhe duke ngritur trofetë e Premier League dhe Ligës së Kampionëve, ndërsa bëri 492 paraqitje në të gjitha garat.

Më pas, ai bëri një kalim të diskutueshëm te Al Ettifaq në verën e vitit 2023 - zhvendosja në Arabinë Saudite u kritikua duke pasur parasysh mbështetjen e tij të mëparshme për komunitetin LGBTQ+ dhe faktin se homoseksualiteti është i paligjshëm në vendin e Gjirit - të cilën ai e mbrojti në një intervistë me  The Athletic .

Chelsea është aktualisht në Australi në një turne parasezonal, ku do të përballet me Western Sydney Wanderers dhe Tottenham Hotspur, përpara se të luajë kundër Juventusit në Hong Kong.

Gjithsesi, 36-vjeçari Henderson shihet si një përforcim me përvojë për mesfushën e Chelseat, ndërsa aftësitë e tij drejtuese dhe eksperienca në nivelet më të larta të futbollit konsiderohen një vlerë e shtuar për skuadrën londineze.

Deri më tani nuk janë bërë publike detajet financiare apo kohëzgjatja e kontratës së mundshme, ndërsa as Chelsea dhe as Brentford nuk kanë komentuar zyrtarisht mbi negociatat. Megjithatë, Blutë e Londrës janë favoritët absolutë për të siguruar firmën e mesfushorit anglez.