Ish-ambasadori Konçi: Shqipëria përballet me rrezik hakmarrjeje nga Irani, por qëndrimi është i palëkundur

Shqipëria pritet të ndërmarrë një hap të rëndësishëm në politikën e jashtme, duke votuar një rezolutë që e shpall Iranin shtet sponsor të terrorizmit, si dhe Gardën Revolucionare dhe Hezbollahun organizata terroriste.

Në një analizë të situatës, ish-ambasadori i Shqipërisë në Kanada, Besnik Konçi, thekson se ky vendim, ndonëse mbart rrezikun e hakmarrjes, është qëndrimi i duhur dhe i nevojshëm në linjë me aleatët strategjikë.

Në një intervistë për “Ora News”, Konçi pranon se ekziston një rrezik real hakmarrjeje, veçanërisht në dritën e sulmeve të mëparshme kibernetike të atribuara Iranit, si ato të grupit "Homeland Justice" ndaj institucioneve shqiptare, përfshirë Kuvendin.

Megjithatë, sipas tij, fuqia e Iranit për t'u hakmarrë vjen duke u dobësuar dhe qëndrimi i Shqipërisë duhet të jetë i qartë dhe pa hezitim në mbështetje të aleatëve.

Ish-ambasadori argumenton se ky vendim nuk vjen papritur. Sipas tij, Irani ka një histori 47-vjeçare të mbështetjes së terrorizmit përmes grupeve "proksi" si Hezbollah, Houthi-t dhe milicive të tjera në rajon.

Qëllimi i këtyre veprimeve, shpjegon ai, ka qenë sulmimi i interesave amerikane dhe aleate, si dhe destabilizimi i Lindjes së Mesme për të projektuar fuqinë dhe dominimin iranian.

Përpjekjet diplomatike, përfshirë bisedimet dhe sanksionet, deri më tani kanë dështuar për të frenuar ambiciet e Teheranit, veçanërisht në lidhje me programin bërthamor dhe atë të raketave balistike.

Konçi beson se prapa kuintave po zhvillohen kontakte diplomatike për të gjetur një kompromis. Ai interpreton qëndrimin e administratës amerikane si një sinjal se dera është e hapur për një lidership të ri iranian, i cili do të ishte bashkëpunues dhe do të adresonte shqetësimet kryesore ndërkombëtare.

Në këtë sfond të tensionuar, Shqipëria po pozicionohet qartë në krah të aleancës euroatlantike. Vendimi për të shpallur Iranin shtet terrorist është një lëvizje me peshë, që e vendos vendin përballë një situate komplekse.

Sipas analizës së Konçit, çelësi për uljen e tensioneve mbetet një ndryshim në qasjen e lidershipit iranian, duke adresuar problemet që lidhen me programin bërthamor, raketat balistike dhe ndalimin e mbështetjes për grupet proksi.

NDIQNI INTERVISTËN E PLOTË ME AMBASADORIN BESNIK KONÇI