Buxheti 2026 rishikohet me akt normativ/ Rama: Ekonomia në rritje sjell bonus për pensionistët dhe rritje mbështetjesh sociale

Kryeministri Edi Rama, gjatë podcastit të tij të përjavshëm Flasim, u ndal te zhvillimet e javës, me fokus në aktin normativ të qershorit për buxhetin 2026.

Sipas tij, rritja më e mirë se parashikimet e ekonomisë ka krijuar hapësirë për masa të reja financiare, të cilat janë orientuar drejt pensionistëve, shëndetësisë dhe kategorive në nevojë.

Në aktin normativ të buxhetit 2026 janë miratuar disa ndryshime kryesore që lidhen me shpërndarjen e fondeve shtesë të krijuara nga të ardhurat më të larta se parashikimi.

Është miratuar një bonus për pensionistët, i financuar nga të ardhurat e krijuara gjatë vitit, përfshirë edhe efektet e luhatjeve të çmimeve të energjisë dhe karburanteve në tregjet ndërkombëtare.

Në fushën e shëndetësisë, janë shtuar 15 milionë euro për medikamentet për pacientët me sëmundje onkologjike, si dhe është parashikuar rritje e pagave për mjekët e urgjencës.

Ndryshime janë bërë edhe në mbështetjen sociale, ku parashikohet dyfishim i ndihmës për personat me aftësi të kufizuara dhe për fëmijët me nevoja të veçanta, si dhe mbështetje shtesë për kujdestarët e tyre.

Po ashtu, është rritur garancia sovrane për programet kombëtare të zhvillimit ekonomik dhe janë shtuar fondet për zhvillimin rural dhe urban.

FJALA E PLOTË:

Kryeshënimi i javës ishte, pa diskutim, akti normativ i qershorit, ku edhe një herë tjetër ekonomia, e cila po rritet përtej parashikimeve, duke sjellë të ardhura përtej parashikimeve, na dha mundësinë që të dalim me një sërë masash në shërbim të drejtpërdrejtë të njerëzve dhe në respekt të të gjithë atyre që kërkojnë, me shumë të drejtë, akoma më shumë nga qeveria dhe nga shoqëria, përmes qeverisë.

Aprovuam një bonus për pensionistët. Një kujtesë këtu, sepse duhet kujtuar herë pas here ndonjë gjë, edhe pse kujtesa bëhet gjithmonë e më e shkurtër dhe gjithmonë e më shumë janë ata që nuk duan t'ia dinë se nga po vijnë. Por e thotë bukur Çurçilli që "kush harron se nga po vjen, nuk ka idenë se ku po shkon".

Kujtesa është që vjet u tha se bonusi i pranverës për pensionistët, i cili kishte të njëjtën logjikë, pra rritjen e ekonomisë dhe parimin që, në momentin kur ekonomia rritet dhe ne arrijmë t'i plotësojmë ato që kemi parashikuar e na mbetet diçka, ajo që mbetet duhet të ndahet me ata që kanë më shumë nevojë dhe pensionistët janë në radhë të parë ata. "E bënin për fushatë", thanë. Jo. Ne nuk kemi asnjë fushatë. Fushatën tjetër e kemi në 2029-ën. Kështu që pensionistët morën një tjetër bonus, ku u fut edhe çdo qindarkë e përfituar nga rritja e panatyrshme e çmimit të naftës, si rezultat i krizës së luftës mes Shteteve të Bashkuara, Izraelit dhe Iranit dhe asaj që ndodhi në Ngushticën e Hormuzit.

Pra, ne nuk futëm në buxhet asnjë qindarkë që erdhi më shumë nga taksat mbi naftën, por ua dhamë ato pensionistëve. Po kështu, ne vendosëm në dispozicion të të sëmurëve me kancer 15 milionë euro të tjera për medikamentet e tyre dhe vendosëm po ashtu rritjen e pagave të mjekëve të urgjencës. Heronj të vërtetë!

Vendosëm rritjen e garancisë sovrane për programin kombëtar që fillon së shpejti, të dyfishimit të ndërmarrjeve.

Vendosëm dyfishimin e mbështetjes për personat me aftësi të kufizuar.

Vendosëm dyfishimin e mbështetjes për fëmijët me aftësi të veçanta. Kujtoj se vjet, falë edhe një gafe që unë bëra, për të cilën kërkova ndjesë, u bë problem çështja e fëmijëve autikë. Unë u zotova në atë fushatë se do ta dyfishonim mbështetjen për ta dhe e bëmë. Ashtu sikundër u dhamë edhe kujdestarëve të personave me aftësi të kufizuar apo të fëmijëve me aftësi të veçanta një mbështetje që ata e kërkonin prej kohësh, pa llogaritur këtu pastaj edhe pjesët e tjera që shkuan në drejtim të zhvillimit rural dhe të zhvillimit urban.

Ky është një kryeshënim që nuk zuri shumë vend, sepse dihet se me çfarë po merret i gjithë sistemi i komunikimit dhe informacionit në Shqipëri. Ndërkohë që, nga ana tjetër, unë jam shumë i vëmendshëm dhe një ekip i tërë po dëgjon me shumë vëmendje gjithçka që duhet dëgjuar nga protesta e bulevardit, e cila ka dy shtresa: "ujin e rrjedhshëm" të të gjithë atyre që dolën sinqerisht dhe që janë sinqerisht të shqetësuar apo që kanë halle reale dhe "koren e zezë" të gjithë dështakë-zemërakëve të ardhur nga të gjitha rrugët e jetës, që kanë krijuar një situatë konvulsive ku janë shfaqur edhe elementët e pashmangshëm të dhunës në këto raste, pasi kur shkon pas Berihait, në fund të del përpara muri.