Shania Twain tregon pse mungoi në dasmën e Taylor Swift: Ishte nder të isha e ftuar

Shania Twain ka zbuluar arsyen pse nuk ishte e pranishme në dasmën e Taylor Swift dhe Travis Kelce, duke shpjeguar se angazhimet profesionale me Harry Styles e penguan të merrte pjesë në ceremoninë e shumëpërfolur.

Këngëtarja 60-vjeçare, e cila ishte mes të ftuarve në dasmën e zhvilluar më 3 korrik në Madison Square Garden, tha se në të njëjtën periudhë ndodhej në Londër, ku po performonte si pjesë e turneut 12-netësh të Harry Styles në stadiumin Wembley.

Gjatë një interviste në emisionin “The Tonight Show Starring Jimmy Fallon”, Twain u shpreh se ishte shumë e nderuar nga ftesa e Taylor Swift dhe se mezi pret ta takojë sërish për ta uruar personalisht për martesën.

“Ishte shumë nder për mua të isha e ftuar në dasmën e Taylor. Herën tjetër që do ta shoh, sigurisht do ta përgëzoj me gjithë zemër”, tha ajo.

Shania vlerësoi gjithashtu talentin dhe aftësinë e Taylor Swift për të rrëfyer histori përmes muzikës, duke theksuar admirimin që ka për karrierën e saj.

Artistja kujtoi edhe miqësinë e saj me Harry Styles, e cila nisi vite më parë dhe u forcua pas bashkëpunimeve të tyre në skenë, ndërsa zbuloi se këngëtari britanik e kishte kontaktuar personalisht për t’i kërkuar një urim për nënën e tij, një adhuruese e muzikës së saj.

Dasma e Taylor Swift dhe Travis Kelce mblodhi një numër të madh të personazheve të njohur, mes tyre Selena Gomez, Bradley Cooper, Dakota Johnson dhe Ed Sheeran, ndërsa ceremonia u drejtua nga Adam Sandler dhe u shoqërua me një performancë të veçantë nga Paul McCartney.