Sot, në datëlindjen e Viktor Gjikës, regjisorit dhe skenaristit të shquar të kinematografisë shqiptare

Më 23 qershor të vitit 1937 lindi në Korçë regjisori dhe skenaristi i shquar i kinematografisë shqiptare, Viktor Gjika.

Ai i solli publikut shqiptar kryevepra si “Nëntori i dytë”, “Gjeneral Gramafoni”, “Yjet e netëve të gjata”, “Njeriu me top”, “Rrugë të bardha”, “I teti në bronx”, “Përballimi”, “Në çdo stinë”, etj. Krijimet e Viktor Gjikës mbeten në fondin e artë të kinemasë shqiptare dhe të kujtesës kolektive. Për vlerat artistike dhe për veprat e tij dinjitoze, në vitin 1977 iu dha titulli “Artist i Merituar” dhe në 1985 “Artist i Popullit”.

Viktor Gjika i kreu studimet e larta në Moskë, ku studioi së bashku me Dhimitër Anagnostin, për kinooperator. Së bashku, ata kryen temën e diplomës, filmin “Njeriu kurrë nuk vdes”, një ekranizim i tregimit të Ernest Heminguejit, me të cilin fituan Çmimin e Madh në Festivalin Botëror të Shkollave Kinematografike, në vitin 1961.

Pas rikthimit në atdhe Gjika punoi si regjisor dhe skenarist duke dhënë disa nga veprat më me peshë të kinemasë shqiptare. Krahas filmave artistikë ai lëvroi edhe dokumentarin, si “Bistrica ’63”, “Kur vjen Nëntori”, “Horizonte të hapura” dhe portrete për figura kombëtare si Fan Noli dhe Ismail Qemali, duke realizuar në total rreth 15 filma artistikë dhe 25 dokumentarë.

Gjika si regjisor, skenarist dhe kinooperator solli një gjuhë vizuale të re dhe atmosferë realiste që e bëri të dallueshëm në ekran.

Nga viti 1984 deri në 1991 ai ishte drejtor i Kinostudios “Shqipëria e Re”, duke udhëhequr prodhimin e filmave në një periudhë kyçe për kinemanë shqiptare dhe duke u shfaqur si një drejtues i spikatur që i dha frymë të re prodhimit filmik dhe orientoi politikën kulturore të institucionit.

U nda nga jeta më 3 mars 2009.

Në vitin 2021 ai u vlerësua (pas vdekjes) me dekoratën e lartë “Nderi i Kombit” nga Presidenti i Republikës, me motivacionin: “Në shenjë nderimi dhe vlerësimi të lartë shtetëror për kontributet dhe meritat e jashtëzakonshme në kinematografinë shqiptare si operator, skenarist, regjisor e drejtues i spikatur dhe elitar i ish-Kinostudios “Shqipëria e Re”; për vlerat kinematografike shqiptare që krijoi, si dhe përfaqësimit dinjitoz në ekranet botërore, duke ua përcjellë me një mjeshtëri të jashtëzakonshme, dashurinë dhe pasionin për filmin edhe brezave të rinj”.