Sfidat urbane dhe dizajni në kohë krizash globale, festival i arkitekturës në Prishtinë

Në Prishtinë nisi këtë të hënë Festivali i Arkitekturës me temë “The city after, design in the age of crises”.

Ky është edicioni i 14-të i këtij festivali i cili parashikon ligjërata, punëtori dhe turne arkitekturore. I konsideruar si një nga ngjarjet më të mëdha të arkitekturës në Evropën Juglindore, festivali do te trajtoje sfidat urbane dhe rolin e dizajnit në kohë krizash.

Në të gjithë botën, qytetet po formësohen gjithnjë e më shumë nga krizat. Luftërat, fatkeqësitë klimatike, paqëndrueshmëria ekonomike, migrimi i detyruar dhe trazirat politike po transformojnë peizazhin urban me një shpejtësi dhe intensitet të paparë.

Përgjatë shtatë ditëve, festivali do të mbledhë arkitektë, studiues, profesionistë dhe pjesëmarrës nga vende të ndryshme të botës. Tema e “The City After (Qyteti Pas)” fton arkitektët, urbanistët, studiuesit dhe qytetarët të reflektojnë mbi detyrën urgjente të rindërtimit në një epokë të përcaktuar nga krizat e mbivendosura.

Në vend që të përqendrohet vetëm në rimëkëmbje, tema pyet se si rindërtimi mund të bëhet një mundësi për të rimenduar themelet shoqërore, hapësinore dhe mjedisore të jetës urbane.

Çfarë lloje qytetesh duhet të shfaqen pas konfliktit, fatkeqësisë ose shkatërrimit sistemik? Si mund të kontribuojë arkitektura jo vetëm në rindërtimin fizik, por edhe në shërimin kolektiv, qëndrueshmërinë dhe format e reja të jetës qytetare?

Festivali synon të krijojë një platformë ndërkombëtare për shkëmbimin e njohurive, ideve dhe praktikave bashkëkohore në arkitekturë dhe planifikim urban.