Milioneri armen sfidon "botën" me statujën më të madhe të Jezusit!

Një projekt gjigant që synon të ndryshojë panoramën e Armenisë dhe të tërheqë miliona turistë po ngjall debat të ashpër në vend. Biznesmeni dhe politikani i njohur armen, Gagik Tsarukyan, ka nisur ndërtimin e asaj që pritet të jetë statuja më e lartë e Jezus Krishtit në botë.

Monumenti, me një lartësi të planifikuar prej 101 metrash, do të ngrihet në malin Hatis, rreth 25 kilometra në lindje të Jerevanit, duke u bërë i dukshëm nga pjesa më e madhe e kryeqytetit armen.

Tsarukyan, një nga njerëzit më të pasur dhe më me ndikim në Armeni, e konsideron projektin si simbolin e ri të vendit dhe shpreson që ai të shndërrohet në një destinacion të rëndësishëm turistik.

“Ky do të jetë simboli i ri i Armenisë. Krishtërimi do të bëhet marka jonë e re”, është shprehur ai.

Megjithatë, projekti nuk është pritur njësoj nga të gjithë. Kisha Apostolike Armene ka kundërshtuar publikisht ndërtimin e monumentit, duke argumentuar se statujat gjigante nuk përputhen me traditën fetare dhe arkitekturore të vendit.

Edhe ambientalistët kanë shprehur shqetësime për ndikimin që ndërtimi mund të ketë mbi peizazhin natyror të malit Hatis.

Pavarësisht kritikave, punimet po vazhdojnë. Pjesët e monumentit po montohen pranë Jerevanit dhe më pas do të transportohen në majën e malit për instalimin përfundimtar.

Përveç statujës së Jezusit, Tsarukyan ka nisur edhe një tjetër projekt ambicioz – ndërtimin e një replike gjigante të Arkës së Noes, e cila do të përfshijë muze, hotel dhe hapësira për vizitorët.

Ndërsa punimet vijojnë, opinioni publik në Armeni mbetet i ndarë mes atyre që e shohin projektin si një mundësi të artë për promovimin e vendit dhe atyre që e konsiderojnë atë një investim të tepruar dhe larg traditës së krishterë armene.